كوروناۆيرۋستەن كەيىنگى سيندروم بالا جۇرەگىن ايتارلىقتاي زاقىمدايدى - زەرتتەۋ
ونىڭ سالدارىنان كەيبىر بالالار ءومىر بويى دارىگەردىڭ باقىلاۋىندا بولىپ، ءتىپتى وپەراتسياعا الىپ كەلۋى ىقتيمال.
مۇنداي قورىتىندى The Lancet جۋرنالىندا جاريالانعان مەديتسينالىق شولۋدا كەلتىرىلگەن، دەپ حابارلايدى قازاقپارات ءتىلشىسى.
جالپى، بۇل سيندروم دەنى ساۋ بالالاردا كەزدەسەتىندەي بولىپ كورىنەتىن. الايدا، Joe R. and Teresa Lozano Long School of Medicine مەديتسينا مەكتەبى پەدياتريا كافەدراسىنىڭ اسسيستەنتى، نەوناتولوگ، سان-انتونيوداعى تەحاس ۋنيۆەرسيتەتى مەديتسينا ينستيتۋتىنىڭ ماگيسترى دوكتور الۆارو مورەيرونىڭ ايتۋىنشا، مۋلتيجۇيەلى قابىنۋ سيندرومى كوروناۆيرۋس ينفەكتسياسى سيمپتومسىز وتكەننەن كەيىن 3 نەمەسە 4 اپتادان كەيىن پايدا بولادى.
«مالىمەتتەرگە سايكەس، جوعارى تىنىس الۋ جولدارىندا COVID-19-دىڭ كلاسسيكالىق بەلگىلەرى بايقالماعان بالالاردا مۋلتيجۇيەلى قابىنۋ سيندرومى دامۋى مۇمكىن. بۇل - قورقاتىنداي جايت. بالالاردا اۋرۋدىڭ ەشقانداي بەلگىلەرى بولماۋى ىقتيمال. ءتىپتى اۋىرىپ جۇرگەنىن دە بىلمەي قالادى. ءبىراق، بىرنەشە اپتادان كەيىن قابىنۋ ءورشي ءتۇسۋى مۇمكىن»، - دەدى الۆارو مورەيرو.
زەرتتەۋ بارىسىندا 1- قاڭتار مەن 25- شىلدە ارالىعىندا بۇكىل الەمدە تىركەلگەن بالالارداعى مۋلتيجۇيەلى قابىنۋ سيندرومىنىڭ 662 جاعدايى زەردەلەنگەن. بۇل بالالاردىڭ 71 پايىزى قارقىندى تەرەاپيا بولىمشەسىنە جاتقىزىلعان. ولاردىڭ اۋرۋحانادا جاتقان ۋاقىتتارىنىڭ ورتاشا ۇزاقتىعى 7-9 كۇندى قۇراپ وتىر. بالالاردىڭ 100 پايىزىندا قالتىراۋ بولسا، 54 پايىزىندا ءىش اۋرۋى نەمەسە ءىش ءوتۋى بايقالعان.
ال 68,3 پايىزىندا لوقسۋ بولعان. سونىمەن قاتار بالالاردىڭ 90 پايىزى ەكوكارديوگراممادان ءوتىپ، 54 پايىزىندا نورمادان اۋىتقۋ تىركەلگەن. ال ناۋقاستانعان بالالاردىڭ 22,2 پايىزى وكپەنى جاساندى جەلدەتۋ اپپاراتىنا قوسىلعان. بالالاردىڭ 4,4 پايىزىنا ەكستراكورپورالدى مەمبراندى وكسيگەناتسيا تالاپ ەتىلگەن. 11 بالا كوز جۇمعان.
«بۇل SARS- CoV-2-مەن بايلانىستى بالالاردىڭ جاڭا اۋرۋى سانالادى. ول ءولىم-جىتىمگە الىپ كەلۋى دە ىقتيمال. ويتكەنى، اۋرۋ جۇرەك پەن وكپە، اسقازان-ىشەك جولى نەمەسە جۇيكە جۇيەسى بولسىن، اعزانىڭ بىرنەشە جۇيەسىن بىردەن زاقىمدايدى. مۋلتيجۇيەلى قابىنۋ سيندرومىنان تۋىندايتىن قابىنۋ كاۆاساكي اۋرۋى مەن توكسيكالىق شوك سيندرومى كەزىندە پايدا بولاتىن قابىنۋدان دا اسىپ تۇسەدى. 662 بالانىڭ كوپشىلىگىندە جۇرەكتىڭ زاقىمدانۋى بايقالدى. مۇنى ەرەسەكتەردىڭ جۇرەك تالماسىن دياگنوستيكالاۋ ءۇشىن قولداناتىن تروپونين سىندى ماركەرلەر كورسەتىپ وتىر.
سونىمەن قاتار بالالاردا قان تامىرلارىنىڭ كەڭەيۋى ءبىلىندى. مۇنداي قۇبىلىس كاۆاساكي اۋرۋى كەزىندە بايقالاتىن. بالالاردىڭ 10 پايىزعا جۋىعىندا قان تامىرىنىڭ انيەۆريزمى ورىن العان. انيەۆريزمى بار بالالار بولاشاقتا ۇلكەن تاۋەكەلدەرگە ۇشىرايدى. تاعى ءبىر قورىتىندى، مۋلتيجۇيەلى قابىنۋ سيندرومى بار پاتسيەنتتەردىڭ جارتىسىنا جۋىعىنىڭ نەگىزگى اۋرۋلارى بولسا، جارتىسى سەزىمىزدىكتەن نەمەسە ارتىق سالماقتان زارداپ شەككەن.
بۇل مالىمەتتەر مۋلتيجۇيەلى سيندرومى بار بالالاردا قاتتى قابىنۋ مەن جۇرەك ءتىنىنىڭ زاقىمدانۋى بايقالادى. ولاردىڭ ۋاقىت وتە كەلە قانداي سالدارى بولاتىندىعىن ءتۇسىنۋ ءۇشىن بىزگە بۇل بالالاردى ءجىتى باقىلاۋعا الۋ قاجەت»، - دەدى دوكتور مورەيرو.
