قازاقستاندا بەلگىسىز جاڭا باكتەريا پايدا بولدى
قازىرگى اتاۋى سۋپەرباكتەريا دەپ اتالادى. لابوراتوريادا جۇرگىزىلگەن زەرتتەۋگە سەنسەك، قازىر ەلىمىزدە باكتەريانى ولتىرەتىن پرەپارات جوق. ءبىر عانا دارىمەن ەمدەۋگە بولادى. ءبىراق ول قازاقستاندا تىركەلمەگەن. ءتيىستى تالداۋ تاپسىرمايىنشا، ەشبىر ادام ول كەسەلدىڭ بويىندا بار ەكەنىن بىلمەي جۇرە بەرۋى مۇمكىن. تەك زەرتحاناعا تالداۋ تاپسىرىپ قانا ءارتۇرلى اۋرۋدىڭ الدىن الۋعا بولادى. بۇل باكتەريا كوپ انتيبيوتيك قابىلداعان ادامدار اراسىندا ءجيى كەزدەسىپ جاتىر.
«سەبەبى انتيبيوتيكتەر بويداعى يممۋنيتەتتى السىرەتىپ، وسى باكتەريانىڭ ورشۋىنە جول بەرەدى»، - دەيدى ماماندار.
الەكسەي بالاس، «كدل وليمپ» جەلىسىنىڭ ماركەتينگ جانە يننوۆاتسيا جونىندەگى ديرەكتورى:
- ءبىز جۇرگىزگەن زەرتتەۋگە وراي بۇل باكتەريانى جەڭۋگە ەشقانداي ءدارىنىڭ كومەگى بولماي تۇر. جالعىز ءدارى بار، ونىڭ ءوزى قازاقستاندا تىركەلمەگەن. سونىمەن قاتار قازىر ادامداردىڭ اراسىندا بۇل باكتەريا كوبەيگەنىن بايقاپ وتىرمىز.
ايتا كەتەيىك، باكتەريولوگيالىق تالداۋدى رەسپۋبليكانىڭ كەز كەلگەن مەديتسينالىق مەكەمەسىندە تاپسىرۋعا بولادى. الايدا، قازىر بەلگىلى بولعانداي، كەيبىر دارىگەرلەر «پاندەميانىڭ باسىندا مۇنداي سۋپەرباكتەريانىڭ پايدا بولۋى مۇمكىن» دەپ بولجاعان. «كوكتەمدە انتيبيوتيكتەردى جاپپاي تاعايىنداۋ تۋرالى شەشىم قاتە» دەپ تە ايتىلعان. ەۋروپا ەلدەرىندە انتيباكتەريالدى پرەپاراتتار وتە سيرەك جاعدايلاردا تاعايىندالادى. ال، ءبىزدىڭ ەلدە تۇماۋعا دا انتيبيوتيك تاعايىنداپ جاتادى. دارىگەردەن وسى باكتەريا تۋراسىندا سۇراپ كوردىك.
انجەلا اشيحمينا دارىگەر- تەراپيەۆت:
- وكىنىشكە قاراي، مەندە بۇل سۇراققا جاۋاپ جوق. بۇل قاراپايىم دارىگەرلەر ەمەس، دەنساۋلىق ساقتاۋ مينيسترلىگىنىڭ پروبلەماسى مەن مىندەتى. سەبەبى، پاندەميا كەزىندە انتيبيوتيكتى وڭدى- سولدى پايدالانۋ ەلىمىزدە وسىنداي باكتەريانىڭ پايدا بولۋىنا اكەلدى.
www.24.kz
