شىعىس قازاقستان وبلىسىندا «ەمشىلەر» قاماۋعا الىندى

شىعىس قازاقستان وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، قارت كىسىلەردى اڭگىمەگە تارتقان جالعان ەمشىلەر: «سىزگە دۋا جاسالعان. تەز ارادا ونى قايتارۋ كەرەك»، - دەپ ارباعان.

تامىز ايىنىڭ سوڭىندا 70 جاستاعى زەينەتكەر الدانىپ قالعانىن ايتىپ بەسقاراعاي اۋداندىق پوليتسيا بولىمىنە جۇگىندى. ونىڭ ايتۋىنشا، ءتۇس ۋاقىتىندا ۇيىنە بەلگىسىز ەكى ايەل ءۇي ساتىپ الاتىندىعىن ايتىپ كەلگەن. ءسوز اراسىندا ولار اجەگە دۋا جاسالعانىن، ونى قايتارۋ ءۇشىن بىرنەشە ءراسىم قاجەتتىگىن جەتكىزەدى. بۇعان سەنگەن قالا تۇرعىنى الاياقتارعا اقشا مەن التىن اشەكەيلەرىن بەرە سالعان.

«ەمشىلەر» التىندى تۇيىنشەككە وراپ زەينەتكەرگە بەرەدى دە، تەك بىرنەشە كۇننەن كەيىن اشۋعا بولاتىنىن ايتادى. الايدا كەيىننەن تۇيىنشەكتىڭ ىشىندە ەشتەڭە جوق بولىپ شىقتى. سالدارىنان قاريالارعا 300 مىڭ تەڭگە مولشەرىندە ماتەريالدىق زالال كەلتىرىلگەن. بۇدان بولەك، ءدال وسىنداي ادىسپەن الاياقتار ۇلان اۋدانىنىڭ 81 جاستاعى تۇرعىنىنىڭ 1,5 ميلليون تەڭگەدەن استام قاراجاتىن يەمدەندى.

«ءتارتىپ ساقشىلارى اككى الاياقتاردىڭ كىم ەكەنىن انىقتاۋ ءۇشىن جەدەل- ىزدەستىرۋ شارالارىن جۇرگىزدى. كوپ ۇزاماي سەمەي قالاسىنان كۇدىكتىلەر انىقتالىپ، ۇستالدى. ولار الماتى وبلىسىنىڭ تۇرعىندارى بولىپ شىقتى. 32 جانە 52 جاستاعى ەكى ايەل جانە ولاردىڭ 36 جاستاعى سىبايلاستارى ءوز كىنالارىن مويىنداپ وتىر. ايعاقتى زاتتار تاركىلەنىپ، كۇدىكتىلەر ۋاقىتشا ۇستاۋ يزولياتورىنا قاماۋعا الىندى»، - دەيدى ش ق و پ د باستىعى ساعات ماديەۆ.

اتالعان فاكتى بويىنشا ق ر ق ك- ءنىڭ 190-بابى 1-بولىگى (الاياقتىق) بويىنشا سوتقا دەيىنگى تەرگەۋ امالدارى جۇرگىزىلۋدە.

اۆتور: تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى