جولداۋ: كەلەر جىلدان باستاپ مەملەكەتتىك قىزمەتشىلەرگە جالاقى تولەۋ جۇيەسى وزگەرەدى
بۇل تۋرالى ق ر مەملەكەتتىك قىزمەت ىستەرى اگەنتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى نۇرگۇل جاننانازاروۆا ءمالىم ەتتى. مەملەكەت باسشىسى بيىلعى جولداۋىندا جالاقى تولەۋدىڭ جاڭا جۇيەسىن ەنگىزۋدى تاپسىردى.
وسىلايشا، مەملەكەتتىك قىزمەتكەرلەردىڭ جاۋاپكەرشىلىگى مەن موتيۆاتسياسى نىعايتىلماق. ەكى جىلدان بەرى ماڭعىستاۋ وبلىسىندا پيلوتتىق جوبا رەتىندە جۇزەگە اسىپ كەلە جاتقان وسىنداي جۇيە تيىمدىلىگىن كورسەتتى. فاكتورلىق-بالدىق شكالا بويىنشا ەڭبەكاقى مەملەكەتتىك قىزمەتكەردىڭ جۇمىسىنىڭ كولەمى مەن قيىندىعىنا بايلانىستى تولەنەدى. ونىڭ ءداستۇرلى جالاقى تولەۋدەن ارتىقشىلىعى وسىندا.
«فاكتورلىق- بالدىق شكالانىڭ ەنگىزىلۋى اسىرەسە ورتالىق اتقارۋشى ورگاندار مەن جەرگىلىكتى اكىمدىكتەگى قىزمەتشىلەر اراسىنداعى جالاقى ايىرماشىلىعىن 70 پروتسەنتتەن 20 پروتسەنتكە دەيىن قىسقارتتى. وسى فاكتورلىق- بالدىق شكالا ەنگىزىلگەلى بەرى ماڭعىستاۋ وڭىرىندە مەملەكەتتىك قىزمەتتىڭ يميدجى ارتتى دەپ ايتۋعا بولادى. وعان ناقتى دالەلدەرىمىز دە بار. بۇرىن ءبىر ورىنعا وتە از ۇمىتكەر بولاتىن، قازىرگى كۇنى ورتاشا العاندا 2,5-3 ادامداي بولىپ تۇر»، - دەدى نۇرگۇل جاننازاروۆا.
وڭىردە مەملەكەتتىك قىزمەتتەن كەتەتىندەردىڭ سانى 4 ەسەگە ازايعان. بۇرىنعى ۋاقىتتا جەرگىلىكتى اكىمدىكتەردەن ءوز ەركىمەن كەتەتىندەر سانى 7,5 پروتسەنت بولسا، بۇگىندە بۇل قىزمەتكە دەگەن قىزىعۋشىلىق ارتقان. اۋىل اكىمدىكتەرىندە دە مامان تاپشىلىعى جويىلدى.
ماسەلەن، 2017 -جىلى 28 بوس ورىن بولعان، ال بيىل 2-اق ورىن بوس تۇر. سونىمەن قاتار جەكە سەكتوردان مەملەكەتتىك قىزمەتكە اۋىسۋشىلار دا كوبەيگەن. 2 جىل ىشىندە 1200 قىزمەتكەر جاڭا جۇيەمەن جالاقى العان. ال كەلەر جىلى 1-شىلدەدەن باستاپ ولاردىڭ قاتارى 1500 گە ارتپاق.
