شامالعانداعى اپات: سوت ۇكىمى وزگەردى

الماتى وبلىستىق سوتىنىڭ اپەللياتسيالىق كوللەگياسى ازاماتتىق شاعىمداردى ءىشىنارا قاناعاتتاندىرۋ تۋرالى شەشىم شىعاردى. ناقتىراق ايتقاندا، جانىبەكوۆا مەن اۋباكىر ب. م. مورالدىق شىعىندى تەك احمەدجانوۆ د. د. قىزمەت ەتكەن «ق ت ج» ۇ ك ا ق-نان عانا وندىرە الاتىن بولدى.

الايدا، جابىرلەنۋشىلەر «قاسكەلەڭ اۆتوبۋس پاركى» ج ش س مورالدىق شىعىندى ءوندىرۋ ءۇشىن سوتقا ازاماتتىق شاعىم تۇسىرۋگە قۇقىلى بوپ قالا بەرەدى. سونىمەن قاتار، سوت جابىرلەنۋشىلەر ە. ا. جانىبەكوۆانىڭ، ب. م. اۋباكىردىڭ جانە ل. ا. جارىلعاسوۆانىڭ «قازاقستان تەمىر جولى» ۇلتتىق كومپانياسى» اكسيونەرلىك قوعامىنان جانە «قاسكەلەڭ اۆتوبۋس پاركى» ج ش س- دان مورالدىق زالالدى وتەۋ تۋرالى ازاماتتىق تالاپ ارىزدارىن قارادى.

ە. ا. جانىبەكوۆانىڭ پايداسىنا «قازاقستان تەمىر جولى» كومپانياسىنان - 5 ميلليون تەڭگە، «قاسكەلەڭ اۆتوبۋس پاركىنەن» 5 ميلليون تەڭگە ءوندىرىلدى. ب. م. اۋباكىردىڭ پايداسىنا «قازاقستان تەمىر جولى» كومپانياسىنان - 15 ميلليون تەڭگە، «قاسكەلەڭ اۆتوبۋس پاركىنەن» 15 ميلليون تەڭگە ءوندىرىلدى. ل. ا. جارىلعاسوۆانىڭ پايداسىنا «قازاقستان تەمىر جولى» كومپانياسىنان 15 ميلليون تەڭگە ءوندىرىلدى.

سونىمەن بىرگە، جابىرلەنۋشى ل. ا. جارىلعاسوۆانىڭ ماتەريالدىق شىعىندى ءوندىرۋ تۋرالى تالاپ ارىزى قاناعاتتاندىرىلىپ، ونىڭ پايداسىنا ستانسيا كەزەكشىسى د. د. احمەدجانوۆتان 600 مىڭ تەڭگە وندىرىلگەن ەدى. ەسكە سالساق، 2019 -جىلى 15-قىركۇيەكتە شامالعان ستانسياسىندا رەلستىڭ ۇستىندە تۇرىپ قالعان جولاۋشىلار اۆتوبۋسىمەن جولاۋشىلار پويىزى سوقتىعىسقان بولاتىن. سالدارىنان اۆتوبۋس جۇرگىزۋشىسى سول جەردە مەرت بولىپ، تاعى 3 ادام قاراساي اۋداندىق اۋرۋحاناسىنىڭ جانساقتاۋ بولىمىنە ءتۇستى.

اتالعان بەكەتتە كەزەكشى بولىپ جۇمىس ىستەيتىن د. د. احمەدجانوۆقا قاتىستى قىلمىستىق ءىس ق ر ق ك-نىڭ 344-بابى 2-بولىگىندە كوزدەلگەن (جول قوزعالىسى قاۋىپسىزدىگى نەمەسە تەمىرجول كولىگىن پايدالانۋ ەرەجەلەرىن بۇزۋ سالدارىنان ابايسىزدا ادام ولىمىنە اكەپ سوعۋ) ارەكەتپەن سارالانىپ، الماتى وبلىسى قاراساي اۋداندىق سوتىنىڭ وندىرىسىنە تۇسكەن. سوت جازانى تاعايىنداۋ كەزىندە ستانسيا كەزەكشىسى احمەدجانوۆتىڭ ءوز كىناسىن مويىنداپ، شىن وكىنۋىن، ونىڭ جاسىن، وتباسىلىق جاعدايىن ەسكەرە وتىرىپ، ونى 3 جىل 6 ايعا شارتتى تۇردە سوتتاعان ەدى. وسى وقيعادان كەيىن شامالعان ستانسياسىندا ەستاكادا تۇرىندە جول وتپەسىن سالۋ شەشىلدى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى