قازاقستان اۋماعىنان ادامداردى شىعارىپ جىبەرۋ ءتارتىبى رەتتەلمەك

«ىشكى ىستەر مينيسترلىگى مالىمەتىنشە، سوڭعى ەكى جىل مەن بيىلعى سەگىز ايدا قازاقستان زاڭناماسى تالاپتارىن ورىنداماعانى ءۇشىن ەل اۋماعىنان 25,5 مىڭ شەتەلدىك شىعارىلدى. ونىڭ ىشىندە ەكى مىڭعا جۋىعى سوت اكتىسىن ورىنداماعان. ولاردىڭ اراسىندا اكىمشىلىك ءارى قىلمىستىق قۇقىقبۇزۋشىلىق جاساعاندار بار. ميننيسترلىك اقپاراتىنا قاراعاندا، اتالعان مەرزىمدە قازاقستانعان كەلەتىن شەتەلدىكتەر تاراپىنان (جىل سايىن ەل اۋماعىنا 6 ميلليونعا جۋىق كەلەدى) 220 مىڭنان استام اكىمشىلىك قۇقىق بۇزۋشىلىق پەن 4 مىڭعا جۋىق قىلمىس جاسالدى»، - دەدى ءماجىلىس دەپۋتاتى ۆاسيلي ولەينيك زاڭ جوباسى بويىنشا بايانداماسىندا.

ونىڭ سوزىنە قاراعاندا، قازىرگى كەزدە 1,3 مىڭنان استام شەتەلدىك باس بوستاندىعىنان ايىرۋ ورىندارىندا جازاسىن وتەپ جاتىر جانە پروباتسيالىق باقىلاۋدا. زاڭ جوباسىن قابىلداۋ مىناداي مىندەتتەردى شەشۋگە مۇمكىندىك بەرەدى:

1) ادام قۇقىقتارىن قورعاۋ سالاسىنداعى ۇلتتىق زاڭناماعا حالىقارالىق ستاندارتتاردى ەنگىزۋ؛

2) قازاقستان رەسپۋبليكاسى كونستيتۋتسيالىق كەڭەسىنىڭ ادامداردى (شەتەلدىكتەر مەن ازاماتتىعى جوق ادامداردى) قازاقستان رەسپۋبليكاسىنان تىسقارى جەرلەرگە شىعارىپ جىبەرۋ كەزىندە ۇستاپ الۋ مەرزىمدەرىن قوسىمشا زاڭنامالىق رەتتەۋ تۋرالى ۇسىنىستارىن ورىنداۋ، ولاردى ۇستاپ الۋ جانە كەيىننەن ىشكى ىستەر ورگاندارىنىڭ ارناۋلى مەكەمەلەرىنە ورنالاستىرۋ ءتارتىبىن رەگلامەنتتەۋ. جوعارىدا كورسەتىلگەن مىندەتتەردى ىسكە اسىرۋ ازاماتتاردىڭ، سونداي-اق شەتەلدىكتەر مەن ازاماتتىعى جوق ادامداردىڭ بوستاندىعىنا جانە جەكە باسىنا قولسۇعىلماۋشىلىعىنا قۇقىقتاردى قورعاۋ سالاسىنداعى ۇلتتىق زاڭنامانى ودان ءارى جەتىلدىرۋدى قامتاماسىز ەتەدى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى