زەينەتاقى مەن جاردەماقىنى تاعايىنداۋ، تولەۋ ءتارتىبى سيفرلاندىرىلادى
«جولداۋدا ايتىلعانداي «سيفرلاندىرۋ - بارلىق رەفورمانىڭ نەگىزگى ەلەمەنتى». سيفرلىق تەڭسىزدىكتى جويۋ جانە ينتەرنەتكە بارىنشا قول جەتكىزۋدى قامتاماسىز ەتۋ جونىندە شارالار قابىلدانادى. زەينەتاقى مەن جاردەماقىلاردى تاعايىنداۋ جانە تولەۋ سيفرلاندىرىلادى. دەرەكتەر بازاسىنىڭ ءبىرىڭعاي جۇيەسى قۇرىلادى»، - دەدى ۇلتتىق ەكونوميكا ءمينيسترى رۋسلان دالەنوۆ ۇكىمەت وتىرىسىندا پرەزيدەنت جولداۋىن جۇزەگە اسىرۋ بويىنشا جالپى ۇلتتىق ءىس-شارالار جوسپارىنىڭ جوباسىن جاريالاي وتىرىپ.
مينيستر سونداي-اق ازاماتتاردىڭ مەملەكەتتىك باسقارۋ ماسەلەلەرىن شەشۋگە بەلسەندى قاتىسۋىن كەڭەيتۋ ماقساتىندا ونلاين-پەتيتسيالاردىڭ ءبىرىڭعاي زاڭدى ينستيتۋتى قۇرىلاتىنىن جەتكىزدى.
«اۋىل اكىمدەرىن تىكەلەي سايلاۋ وتكىزىلەدى. ءماسليحاتتار قىزمەتىنىڭ اشىقتىعى ارتادى. جەرگىلىكتى ءوزىن-ءوزى باسقارۋ ورگاندارىنىڭ مارتەبەسى مەن وكىلەتتىكتەرى كۇشەيتىلەدى»، - دەدى ول.
