كۇيزەلىسكە تۇسپەۋ ءۇشىن
ا ق ش- تىڭ دجوردجيا شتاتىنداعى ۋنيۆەرسيتەتتىڭ عالىمدارى فيزيكالىق جاتتىعۋلار كەزىندە كۇيزەلىس گورمونى كورتيزولدىڭ مولشەرىن ازايتاتىن زاتتار جاسالاتىنىن انىقتاعان. JNeurosci جۋرنالىندا جاريالانعان زەرتتەۋدە فيزيكالىق جاتتىعۋ كەزىندە اعزادا گالانين اتتى زات وندىرىلەتىنى ايتىلعان. گالانين جۇيكە جۇيەسىندە وندىرىلەتىن اقۋىز مولەكۋلاسىنىڭ نەيروپەپتيد تۇرىنە جاتادى. ءدال وسى زات ادامنىڭ كوڭىل كۇيىنە اسەر ەتىپ، ۋايىم مەن كۇيزەلىسكە قارسى تۇرۋعا كومەكتەسەدى ەكەن.
عالىمدار گالانيننىڭ ماڭىزىن زەرتتەۋ ءۇشىن زەرتحانا تىشقاندارىن تاڭداعان. ولاردى ەكى توپقا ءبولىپ، ءبىرى فيزيكالىق بەلسەندى بولۋ ءۇشىن جۇگىرۋگە ارنالعان دوڭگەلەگى بار تورعا، ەكىنشىلەرىن بوس تورعا ورنالاستىرعان. ءۇش اپتاعا سوزىلعان زەرتتەۋ كەزىندە ەكى توپ تىشقاندارىن قىسقامەرزىمدى كۇيزەلىسكە دۋشار ەتكەن. ناتيجەسىندە فيزيكالىق بەلسەندى بولعان تىشقاندار ەكىنشىلەرىنە قاراعان كۇيزەلىسكە الدەقايدا ءتوزىمدى بولاتىنى انىقتالعان. ءبىرىنشى توپ تىشقاندارىنىڭ ميىندا گالانين نەيروپەپتيدىنىڭ كوپ مولشەردە بولعانى بەلگىلى بولدى. ءبىر قىزىعى، گالانيننىڭ كوپ مولشەرى ميدىڭ كۇيزەلىسكە قارسى رەاكتسياسىنا جاۋاپ بەرەتىن بولىگىندە ورنالاسقان. وسىدان عالىمدار تۇراقتى تۇردە سپورتپەن شۇعىلداناتىن، فيزيكالىق بەلسەندى ادامدار كۇيزەلىسكە الدەقايدا ءتوزىمدى دەگەن تۇجىرىمعا كەلدى.
فيزيكالىق جاتتىعۋدىڭ كۇيزەلىسكە قارسى اسەر ەتەتىنى تۋرالى تاعى ءبىر قىزىق تاجىريبە وتكەن. بۇرىن- سوڭدى مۇلدەم سپورتپەن اينالىسپاعان كوللەدج ستۋدەنتتەرىنە اپتاسىنا ەكى نەمەسە ءۇش رەت سپورتزالعا بارۋعا كەڭەس بەرىلگەن. ناتيجەسىندە زەرتتەۋگە قاتىسقان ستۋدەنتتەر جاتتىعۋلاردىڭ كۇندەلىكتى ومىرىنە جاقسى اسەر ەتكەنىن العا تارتادى. بۇدان بولەك، ستۋدەنتتەردىڭ بويىنان سترەستىڭ ازايعانى، الكوگول، شىلىمنان باس تارتقانى نەمەسە تەمەكى مولشەرىن ازايتقانى بايقالعان. وعان قوسا ولار پايدالىراق تاعامداردى دا تۇتىنىپ، وقۋ ۇلگەرىمدەرىنىڭ ساپاسىن دا كوتەرە باستاعان.
ايتا كەتەرلىك تاعى ءبىر جايت، 2 ايلىق تۇراقتى جاتتىعۋدان كەيىن زەرتتەۋگە قاتىسۋشىلار اراسىندا وزدەرىن قاداعالاۋ كورسەتكىشى جوعارىلاعان. باسقاشا ايتقاندا، ستۋدەنتتەر وقۋ بارىسىنداعى ەڭ قيىن ساتتەردە دە سابىر مەن جيناقىلىق تانىتا باستاعان. سونداي- اق، سپورت ولارعا كۇيزەلىستەن ارىلىپ قانا قويماي، اۋقىمى ۇلكەن اقپاراتتاردى وڭاي قابىلداۋعا كومەكتەسكەن.
«The Power of Habit» اتتى كىتاپتىڭ اۆتورى چارلز داحيگتىڭ پىكىرىنشە، كۇندەلىكتى جاتتىعۋلار اۋەلى ءومىردىڭ ءبىر بولىگىنە اسەر ەتىپ، سودان كەيىن ءومىردىڭ باسقا تۇستارىن وزگەرتۋگە كىرىسەدى ەكەن. بۇل ادەتتەردىڭ كۇشتىلىگى سونشالىق، وزىمىزگە قاتىستى پىكىردى وزگەرتىپ، جاڭا مۇمكىندىكتەردى بايقاۋعا جول اشاتىن كورىنەدى.
ماسەلەن، Back on My Feet دەپ اتالاتىن قايىرىلىمدىلىق جوباسى ايتارلىقتاي ناتيجە كورسەتكەن. ول جوبا اياسىندا وتكەن مارافونعا 5000 نان استام ءۇيسىز ادام قاتىسقان. مارافونعا قاتىسقانداردىڭ 40 پايىزى جۇمىس تابۋعا مۇمكىندىك السا، 25 پايىزى تۇراقتى باسپاناعا قول جەتكىزگەن.
massaget.kz
