ءۇي الماق بولعان ءوڭىر تۇرعىندارى ەلوردالىق الاياققا الداندى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، قاسكويدىڭ ارەكەتىنەن قازاقستاننىڭ بىرنەشە ءوڭىرىنىڭ تۇرعىندارى زارداپ شەككەن، ونىڭ ىشىندە ءۇش پەتروپاۆلدىق تا بار. الاياق ءسۇرىلۋى ءتيىس ەسكى ۇيلەردىڭ يەلەرىمەن بايلانىسقا شىعىپ، ولارعا جاڭا سالىنىپ جاتقان ۇيلەردەن پاتەر الۋعا كومەكتەسۋگە ۋادە بەرگەن. ول ءۇشىن باستاپقى جارنا سالۋ قاجەتتىگىن جانە «قول ۇشىن بەرگەنىنە» سىياقى بەرەتىندىكتەرىن ايتقان. وسىلايشا، پەتروپاۆلدىقتاردىڭ ءبىرى 5 ميلليون تەڭگەگە جۋىق اقشاسىنان ايىرىلدى. كۇدىكتى نۇر- سۇلتان قالاسىنىڭ 34 جاستاعى تۇرعىنى بولىپ شىقتى. ونى استانالىق پوليتسەيلەر قولعا ءتۇسىردى. پەتروپاۆلدىق ءتارتىپ ساقشىلارى تىركەلگەن ەپيزودتار بويىنشا ماتەريالداردى ارىپتەستەرىنە تابىس ەتتى.
«قازىرگى ۋاقىتتا الاياقتار ينتەرنەت ارقىلى ءوز ويلارىن جۇزەگە اسىرادى. ولار الداپ العان مالىمەت ارقىلى قاشىقتان بانك شوتىنداعى اقشانى ولجالايدى. كوبىنەسە، تۇرعىن ءۇيدى ءتيىمدى ساتۋ- ساتىپ الۋعا، قاجەتتى قۇجاتتاردى جاساۋعا «كومەكتەسۋگە» نەمەسە اقشانى اينالىمعا جىبەرۋگە ۋادە بەرەدى. الاياقتار ءوز قۇرباندارىنىڭ سەنىمىنە كىرىپ، قىزمەت الۋدى تەزدەتۋ ءۇشىن اقشا تالاپ ەتەدى. ادامداردى اسا ساق بولۋعا، كۇماندى ۇسىنىستارعا سەنبەۋگە، بوگدە بىرەۋلەرگە اقشا اۋدارماس بۇرىن مۇقيات تەكسەرۋگە شاقىرامىز»، - دەيدى س ق و پ د كريمينالدىق پوليتسيا باسقارماسىنىڭ باستىعى پەتر كليموۆ. جالپى جىل باسىنان س ق و پوليتسەيلەرى 189 الاياقتىقتى اشتى.
