اقجارقىن تۇرلىبايدى قازاقستان تۇرمەسىنە اۋىستىرىپ الۋعا تولىق مۇمكىندىك بار - باس پروكۋراتۋرا
بۇل تۋرالى ق ر باس پروكۋرورىنىڭ ورىنباسارى مارات احمەتجانوۆ ايتتى، دەپ حابارلايدى قازاقپارات ءتىلشىسى.
«ءبىزدىڭ مالىمەتىمىزگە سايكەس، بۇگىندە ونىڭ ۇكىمى زاڭدى كۇشىنە ەندى. قىتاي حالىق رەسپۋبليكاسىمەن سوتتالعان ازاماتتارىمىزدى ءبىر-بىرىمىزگە بەرۋ تۋرالى ەكىجاقتى كەلىسىمشارت بار. ءبىرىنشى شارتى - ول ءوزىنىڭ سوتتىلىعىن قازاقستان رەسپۋبليكاسىندا وتەۋگە نيەتتى ەكەندىگى تۋرالى جازباشا ءوتىنىش بەرۋى ءتيىس. سودان كەيىن ق ح ر پروكۋراتۋراسىنا قازاقستاندىقتى تۋعان جەرىنە ەستراديتسيالاۋ مۇمكىندىگى تۋرالى حابارلاما جىبەرەدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، اقجارقىن تۇرلىباي قىتايدا ەسىرتكى كونترابانداسى ءۇشىن باس بوستاندىعىنان ايرىلىپ وتىر. قازاقستاندا دا ەسىرتكى تاسىمالداپ، ساتقانى ءۇشىن باس بوستاندىعىنان ايىرۋ جازاسى كوزدەلگەن.
«ەگەر ونىڭ ارەكەتى وسىعان وراي بولسا، وندا مەنىڭشە، كەلىسىمشارتقا سايكەس جانە بارلىق ماتەريلدار زەردەلەنگەننەن كەيىن ونى قازاقستاندا جازاسىن وتەۋ ءۇشىن ەكسترادتسيالاۋعا تولىق مۇمكىندىك بار. ءبىراق، ازىرشە ونىڭ تاراپىنان بۇگىنگە دەيىن باس پروكۋراتۋراعا ءوتىنىش تۇسكەن جوق. مۇنان بولەك، قورعاۋشىلارى، ق ح ر-داعى كونسۋلدىعىمىز، ەلشىلىگىمىز بار. وسىعان وراي بىزگە رەسمي ءوتىنىم تۇسە سالىسىمەن وسى باعىتتاعى جۇمىستى باستايمىز»، - دەدى مارات احمەتجانوۆ.
بۇعان دەيىن حابارلانعانداي، 2019 -جىلدىڭ 27-جەلتوقسانىندا گۋاڭجوۋ قالاسىنىڭ حالىق سوتىندا ەسىرتكى كونترابانداسى ءۇشىن ايىپتالعان قازاقستاندىق اقجارقىن تۇرلىبايعا قاتىستى قىلمىستىق ءىس بويىنشا ۇكىم جاريالاندى. قىتاي سوتى ءومىر بويى باس بوستاندىعىنان ايىرۋ تۋرالى ۇكىمدى وزگەرىسسىز قالدىردى.
كەيىننەن قورعاۋشى تاراپ سوت ۇكىمىنە شاعىم جاسادى. الايدا، قوسىمشا تەرگەۋ ناتيجەلەرى بويىنشا سوت باستاپقى ۇكىمدى وزگەرىسسىز قالدىردى. قولدا بار اقپاراتقا سايكەس، ا. تۇرلىباي وسى ايدىڭ ىشىندە گۋاڭدۋن پروۆينسياسى تۇرمەلەرىنىڭ بىرىنە اۋىستىرىلادى. جاقىندا سىرتقى ىستەر مينيسترلىگى اقجارقىن تۇرلىبايدى قازاقستانعا بەرۋ ءراسىمىن قولدانۋ قاراستىرىلىپ جاتقانى تۋرالى حابارلادى.
اۆتور: مارلان جيەمباي
