ەلوردادا بالالار كوپ قاباتتى ءۇيدىڭ شاتىرىنا شىعىپ، ۆەلوسيپەد تەپكەن ۆيدەوسى تاراعان
«الەۋمەتتىك جەلىلەرگە تالداۋ جۇرگىزۋ بارىسىندا ەلورداداعى «ارمان قالا» تۇرعىن ءۇي كەشەنىندەگى پاركينگتىڭ شاتىرىندا ءبىر توپ بالانىڭ ۆەلوسيپەد تەۋىپ جۇرگەنىن انىقتادىق. وقيعا ورنىنا بىردەن پوليتسيا قىزمەتكەرلەرى اتتاندى. انىقتالعانىنداي، پاركينگتىڭ شاتىرعا شىعاتىن ەسىگى اشىلىپ قالىپ، بالالار سول جاقتان كىرىپ كەتكەن. تۇرعىن ءۇي كەشەنىنە قىزمەت كورسەتەتىن ۇيىممەن جۇرگىزىلگەن جۇمىس بارىسىندا ول ەسىككە قۇلىپ سالىندى. ءۇيدىڭ تۇرعىندارىمەن ءتۇسىندىرۋ جۇمىستارى جۇرگىزىلدى»، - دەپ حابارلايدى دەپارتامەنتتەن.
نۇر-سۇلتان قالاسىنىڭ پوليتسيا دەپارتامەنتى اتا-انالاردى بالالاردى قاراۋسىز قالدىرماۋعا شاقىرادى. «ەگەر ءسىز شاتىرعا نەمەسە پاركينگكە شىعاتىن ەسىكتىڭ اشىق تۇرعانىن كورسەڭىز، تۇرعىلىقتى جەردەگى پ ي ك-كە بىردەن حابار بەرىڭىز»، - دەپ ەسكەرتەدى پوليتسيا.
اۆتور: ايان بەكەن ۇلى
