فيلمىگە ءتۇسىپ جاتقان قازاقستاندىق كاسكادەرلەر قىزىقتى فوتو جانە ۆيدەومەن ءبولىستى
اتالعان تۋىندىنىڭ الەمدىك پرەمەراسى 4-قىركۇيەك كۇنى وتكەن بولاتىن، دەپ حابارلايدى قازاقپارات ءتىلشىسى.
«Nomad Stunts» كاسكادەرلەرىنىڭ قاتىسۋىمەن تۇسىرىلگەن «مۋلان» فيلمىندەگى ەڭ تارتىمدى قويىلىمداردىڭ ءبىرى - عۇن كوسەمى ءبورى حاننىڭ (بۇل ءرولدى دجەيسون سكوتت لي سومدايدى) ەليتالى ارناۋلى وتريادىنىڭ قىتاي بەكىنىسىنە شابۋىلى.
تريۋكتەر قويۋشىسىنىڭ سەناريىنە سايكەس، ساربازدار شاۋىپ كەلە جاتقان اتتىڭ ۇستىندە تىك تۇرىپ، سەمسەر سەرمەۋ مەن ساداق تارتۋ سىندى وتە كۇردەلى قويىلىمداردى ورىنداۋى ءتيىس بولعان.
«شاۋىپ كەلە جاتقان اتتىڭ ۇستىندە ساربازداردىڭ تىك تۇراتىن قويىلىمعا ءبىر اي دايىندالدىق. دەگەنمەن، بۇل اتتاردى ءبولىپ- ءبولىپ اكەلۋىمەن بايلانىستى ورىن العان جايت ەدى. باستاپقىدا ءبىر ات بولسا، ودان كەيىن تاعى ەكى ات تاپتىق. سويتە كەلە ولاردىڭ سانىن 13 كە جەتكىزدىك. اي بويى جىلقىلاردى بىرنەشە رەت اۋىستىردىق. سەبەبى كەيبىرەۋى تريۋك جاساۋعا ساي كەلمەدى. بۇعان قوسا، دايىندىق جاساۋعا ارنالعان ىڭعايلى ورىن بولمادى. پروداكشەن ۇسىنعان الاڭ كىشكەنتاي ەدى. حورس-شەبەرمەن سويلەسكەننەن كەيىن دايىندىقتى تىنىق مۇحيتىنىڭ جاعالاۋىندا جاساۋعا رۇقسات بەرىلىپ، بارلىعى جىلدام بولا ءتۇستى. ءتۇسىرىمنىڭ دە ءوز ەرەكشەلىكتەرى بولدى. ءبىزدىڭ جىگىتتەرگە شاۋىپ كەلە جاتىپ، ەرتوقىم ۇستىندە تىك تۇرۋعا، سەمسەرلەرىن سۋىرۋعا تۋرا كەلدى. ال مۇنىڭ بارلىعىن كوزىڭ عانا كورىنەتىن بەتىڭدەگى ماسكامەن، وتە اۋىر كوستيۋمدەرمەن جاساۋ قاجەت. ءبىز شاباندوزدىقتى كورسەتىپ بەردىك. جالپى، سوندىقتان دا «مۋلان» تۇسىرىلىمىنە شاقىرعان بولاتىن. پروديۋسەرلەر ات ۇستىندە كۇردەلى تريۋك ورىنداي الاتىن كاسكادەرلەردى ىزدەگەن بولاتىن. كاسكادەرلەرىمىز بارلىق قيىندىققا قاراماستان جۇكتەلگەن مىندەتتى ورىنداپ شىقتى. كاسكادەر مۇرات بۇرحانوۆ تاماشا تريۋك جاسادى. ول مۋلان ساداق تارتىپ، ءبورى جان ساربازدارىنىڭ ءبىرىن جارالايتىن قويىلىمدا شاۋىپ كەلە جاتقان اتتىڭ اياعىنىڭ استىنا قۇلايدى. بۇل ءبىر دۋبلمەن ءتۇسىرىلدى. رەجيسسەر دە تريۋكتىڭ وتە قاۋىپتى بولعانىنا قاراماستان مۇراتتىڭ ونى وتە كاسىبي دەڭگەيدە ورىنداعانىن بىردەن ايتتى»، - دەدى «Nomad Stunts» كاسكادەرلەر توبىنىڭ جەتەكشىسى، تريۋك قويۋشى جايداربەك كۇنعوجينوۆ.
جوبانىڭ ارقاسىندا «Nomad Stunts» كاسكادەرلەرى Disney مەن ىنتىماقتاستىقتى جولعا قويعان قازاقستاندىقتارعا اينالدى. ال توپ جەتەكشىسى جايداربەك كۇنعوجينوۆ گوليۆۋدتىق ءىرى ستۋديالاردىڭ بىرىنەن ءرول العان تۇڭعىش قازاقستاندىق سانالادى.
«مەنى اكتەر رەتىندە توسىننان تاڭداپ قالدى. باستاپقىدا بۇل رولگە كانادا اكتەرى بەكىتىلگەن بولاتىن. دەگەنمەن، Netflix ستۋدياسىنىڭ «ماركو پولو» سەريالىندا بىرگە جۇمىس ىستەگەن پروديۋسەرلەردىڭ ءبىرى رەجيسسەرعا مەنى الۋدى كوندىردى. باستى سەبەبىنىڭ ءبىرى - ماعان دۋبلەر قاجەت ەمەس. بارلىق تريۋكتى ءوزىم جاساي الامىن. مەنىڭ العاشقى ءتۇسىرىلىم كۇنىم اسكەري كەڭەستە - ءبورى حان بارلىق گەنەرالدارىن جينايتىن قويىلىمدا بولدى.
ەكىنشى كۇنى ءوزىم جاساي الاتىن تريۋك ءتۇسىرىلىپ، وندا اتپەن شاۋىپ كەلە جاتىپ اكتەر دونني يەنمەن سەمسەرلەستىم. شىنىمدى ايتايىن، وتە باقىتتى بولدىم. بارلىق ۋاقىتتا دا Disney-مەن ىنتىماقتاستىق ورناتۋدى ارماندايتىن ەدىم. ال «مۋلان» جوباسىندا حورس- جاتتىقتىرۋشى (اتتاردى تريۋككە دايىندايتىن مامان) عانا ەمەس، اكتەر رەتىندە دە جۇمىس ىستەدىم. بۇل - باعا جەتپەس تاجىريبە بولدى»، - دەدى جايداربەك كۇنعوجينوۆ.
ايتا كەتەرلىگى، «مۋلان» فيلمىندە «Nomad Stunts» توبىنىڭ كاسكادەرلەرى ات ۇستىندە وتە كۇردەلى تريۋكتاردى ورىنداۋمەن قاتار، گوليۆۋد اكتەرلەرىنە دۋبلەر دە بولدى.
اۆتور: مارلان جيەمباي
