الماتىلىق دارىگەر كاۆاساكي سيندرومىنا بايلانىستى اتا- انالارعا ەسكەرتۋ جاسادى
وڭىرلىك كوممۋنيكاتسيالار قىزمەتى الاڭىنداعى ونلاين- سۇحبات بارىسىندا الماتى قالالىق بالالار كلينيكالىق ينفەكسيالىق اۋرۋحاناسىنىڭ دارىگەر- ساراپشىسى، بالالار جۇقپالى اۋرۋلارى كافەدراسىنىڭ مەڭگەرۋشىسى، مەديتسينا عىلىمدارىنىڭ دوكتورى، پروفەسسور عاليا قۇتتىقوجانوۆا، اتا- انالاردان بالالار اراسىنداعى اۋرۋدىڭ الدىن الۋعا جاۋاپكەرشىلىكپەن قاراۋدى سۇرادى.
«اتا- انالار بالالارمەن كوپ جەرلەردە جۇرمەۋى كەرەك، سىرتقى بايلانىستاردى ازايتىپ، ماسكا تاعۋ كەرەك. كوشەدە تاماق ىشپەۋ، گيگيەنانى ساقتاۋ، يممۋنيتەتتى ارتتىرۋ قاجەت. اسقىنعان جاعدايدا ءوزىن - ءوزى ەمدەۋمەن اينالىسپاي، دارىگەرلەرگە جۇگىنۋ كەرەك»، - دەپ ەسكەرتتى گ. قۇتتىقوجانوۆا.
ەپيدەميولوگيالىق تۇراقسىزدىق كەزەڭىندە سانيتارلىق تالاپتاردى ەلەمەگەن جاعدايدا بالالاردا اۋىر اسقىنۋلار بولۋى مۇمكىن.
«ءساۋىر ايىنان كەيىن جاڭا سيندروم - كاۆاساكي پايدا بولدى. بۇل سيندروم ءجيى كەزدەسپەيدى، ءبىراق وتە اۋىر اۋرۋلارعا جاتادى. Covid-19-بەن بايلانىستى بولۋىنا كۇدىك بار. كاۆاساكي اۋرۋى- بۇل بەزگەك، كەم دەگەندە 5 كۇن بولادى. سونىمەن قاتار، كەلەسى بەلگىلەر بار: كوزدىڭ قىزارۋى، اۋىز قۋىسىنىڭ شىرىشتى قابىعىنىڭ گيپەرەمياسى، ەرىننىڭ زاقىمدانۋى، بورتپە، مۇرىننىڭ قابىرشاقتانۋى، اياق - قول مەن تاباننىڭ ءىسىنۋى جانە گيپەرەمياسى (قىزارۋى)، مويىن ليمفا تۇيىندەرىنىڭ ۇلعايۋى»، - دەدى ول.
سونىمەن قاتار، ول بالالاردا كاۆاساكي بەلگىلەرى تولىق بايقالماۋى مۇمكىن ەكەنىن اتاپ ءوتتى. الايدا، جۇرەك اسقىنۋىن بولدىرماۋ ءۇشىن ولاردى اجىراتۋ جانە ەمدەۋدى باستاۋ قاجەت جانە انتيبيوتيكتەردى ءجونسىز پايدالانباۋ كەرەك.
«بالالارعا ۆيرۋسقا قارسى پرەپاراتتاردى قولدانۋ ۇسىنىلمايدى. بالالارعا سيمپتوماتيكالىق ەم قولدانۋ كورسەتىلەدى. اۋرۋدىڭ بەلگىلەرى جانە ۆيرۋستىڭ اعزالارداعى ارەكەتى ناتيجەسىندە پايدا بولعان پروتسەستەر ەمدەلەدى. كاۆاساكي سيندرومى پايدا بولعان كەزدە توپتىڭ كونسيليۋمىن جۇرگىزۋ قاجەت. وعان ينفەكسيونيستەر، ريەۆماتولوگتار، كارديلوگتار جانە رەانيماتولوگتار كىرۋى ءتيىس»، - دەدى گ. قۇتتىقوجانوۆا.
سونىمەن قاتار، ول 1-2 - سىنىپ وقۋشىلارىنا وقۋدىڭ ەرەكشەلىگىنە بايلانىستى مەكتەپكە كۇندىزگى بولىمدە بارۋعا رۇقسات ەتىلەتىنىن اتاپ ءوتتى. «مەنىڭ ويىمشا، 3-4 - سىنىپ وقۋشىلارى مۇعالىمدەرىن كوردى، مەكتەپتە ءبىلمى الدى. سوندىقتان ولار قاشىقتان وقي الادى. ال 1-2 - سىنىپ وقۋشىلارى ساقتىق شارالارىن ساقتاپ، وقۋى كەرەك»، - دەپ تولىقتىردى دارىگەر.
اۆتور: الما مۇقانوۆا
