كوروناۆيرۋس: رومان سكليار رەسەيلىك ۆاكسينانى ساتىپ الۋعا قاتىستى تۇسىنىك بەردى
بۇل تۋرالى ق ر ۇكىمەت باسشىسىنىڭ ورىنباسارى رومان سكليار ايتتى، دەپ حابارلايدى قازاقپارات ءتىلشىسى.
«بيىلعى 24 - تامىزدا ۇكىمەتتىك دەلەگاتسيا قۇرامىندا ءتيىستى الدىن الا كەلىسىمگە قول قويدىق. وعان سايكەس، رەسەي فەدەراتسياسى قازاقستانعا العاشقىلاردىڭ قاتارىندا ۆاكسينانى ساتۋعا مىندەتتى بولادى. الايدا، بۇل شارالار سىناقتىڭ ءۇشىنشى كەزەڭىنەن وتكەننەن كەيىن عانا ەسكەرىلەدى. قازىر سىناقتىڭ ەكى كەزەڭى ءوتتى»، - دەدى ر. سكليار ۇكىمەت ۇيىندەگى باسپا ءسوز ءماسليحاتىندا.
ونىڭ سوزىنە قاراعاندا، شامامەن جەلتوقسان ايىنا قاراي رەسەيلىك ۆاكسينانىڭ ءۇشىنشى سىناق كەزەڭى اياقتالۋى مۇمكىن.
«وسى ءتيىستى سىناقتاردى وتكەننەن كەيىن عانا ونى ساتىپ الۋ تۋرالى شەشىم قابىلدانادى»، - دەدى ۇكىمەت باسشىسىنىڭ ورىنباسارى.
وسى ورايدا ول تامىز ايىنىڭ سوڭىندا بەكىتىلگەن كەلىسىم بارلىق سىناقتار وتكەننەن كەيىن، ۆاكسينانى الۋ مۇمكىندىگى قادامدارىن قامتىپ وتىرعانىن ايتتى. بۇدان بۇرىن حابارلانعانداي، قازاقستان مەن رەسەي كوروناۆيرۋسقا قارسى ۆاكسينانى ساتىپ الۋ تۇرعىسىندا تالقىلاۋ وتكىزدى.
اۆتور: رۋسلان عابباسوۆ
