ۇرلىقتىڭ ءتۇبى قورلىق ەكەنىن جاستاردىڭ ساناسىنا وقۋشى كەزدەن ءسىڭىرۋىمىز كەرەك - ارمان بەردالين
بۇل تۋرالى AntikorLive باعدارلاماسىندا ايتىلدى، دەپ حابارلايدى قازاقپارات ءتىلشىسى.
«ءبىز جەمقورلىققا قاتىستى شەنەۋنىكتەردىڭ باسىنا قارا بۇلت ءۇيىرىپ جاتىرمىز. ءبىز حالىقتىڭ اراسىنا شىعىپ، پارانى كىم بەرىپ جاتقانى تۋرالى سۇراۋىمىز كەرەك. حالىق امالسىزدان پارا بەرەدى، ءبىراق ءپرينتسيپتى تۇردە پارا بەرمەيتىن ادامدار بولادى. ءبىز سونى كوبىرەك ناسيحاتتاۋىمىز كەرەك. مەن مەملەكەتتىك قىزمەتكەرلەردى اقتاپ الايىن دەپ وتىرعان جوقپىن. ءبىز رەسپۋبليكالىق شتابتاعى ازاماتتارمەن قازاقستاندى ەكى رەت اينالىپ شىقتىق. بارلىق وڭىرگە، ونىڭ ىشىندە اۋداندارعا، شالعايداعى اۋىلدارعا دا باردىق. سونىڭ ىشىندە جەمقورلىق فاكتىلەرى كوپ انىقتالعان مەكەمەلەرگە باردىق. ياعني، ارىپتەستەرىنىڭ قولىنا كەشە عانا كىسەن سالىنعان ۇجىمدارعا بارىپ، جاندى جەرلەرىنە تيگىزىپ ناسيحات ايتتىق. جەمقورلىقپەن اشكەرەلەنگەن ازاماتتاردىڭ 1-2 اپتادان كەيىن اكەسى نەمەسە اناسى قۇسادان قايتىس بولعانىن دا ەستىدىك. ولىمنەن ۇيات كۇشتى دەگەندى كوزبەن كورىپ وتىرمىز. ەسكىنىڭ كوبى - قاريالار بالاسىنىڭ ۇرى بولعانىنا شىداماي، دۇنيەدەن ءوتىپ كەتىپ جاتىر. مەملەكەتتىك قىزمەتكەرلەرمەن كەزدەسكەندە وسىنداي مىسالداردى دا ايتىپ جاتىرمىز»، - دەيدى اگەنتتىكتىڭ اقپاراتتىق- اعارتۋشىلىق شتابى جەتەكشىسىنىڭ ورىنباسارى ارمان بەردالين.
ول قازىرگى تولقىندى تاربيەلەي الماساق تا، كەلە جاتقان تولقىندى تاربيەلەۋگە تولىققاندى مۇمكىندىگىمىز بار ەكەنىن ايتتى.
«بالكىم وسى باعدارلاما كورەرمەندەرىنىڭ ۇيىندە بولاشاق اكىم، الدەبىر مەكەمەنىڭ تىزگىنىن ۇستايتىن ازامات ءوسىپ كەلە جاتقان شىعار. ءار ازامات ەڭ الدىمەن ءوزىن جانە وتباسىن تۇزەيتىن بولسا عانا ناتيجەگە جەتەمىز. اگەنتتىكتىڭ ۇلكەن باعىتى - ءبىلىم سالاسىمەن تىعىز جۇمىس ىستەپ جاتىرمىز. بارلىق جوعارى وقۋ ورىندارىندا «سانالى ۇرپاق» دەپ اتالاتىن جوبامىز ىسكە اسىپ جاتىر. ودان بولەك بارلىق مەكتەپتە «ادال ۇرپاق» دەگەن كلۋبتار جۇمىس ىستەيدى. كەيبىر ادام بالالارعا جەمقورلىق تۋرالى مەكتەپتە وقىتۋدىڭ قاجەتى جوق ەكەنى تۋرالى جالاڭ پىكىر ايتتى. قازىردەن باستاپ سىنىپتاسىنىڭ قالامىن ءوز قالتاسىنا سالعان بالا ەرتەڭ قازىنانىڭ قارجىسىنا دا قول سالۋدان قىمسىنبايدى. تامىرىن بالتامەن شاپقانداي قىلىپ، ۇرلىقتىڭ ءتۇبى قورلىق ەكەنىن وقۋشى كەزدەن ساناسىنا ءسىڭىرۋ كەرەكپىز»، - دەيدى ول.
