كوروناۆيرۋستىڭ ءبىرىنشى تولقىنىندا حالىقتى پسيحولوگيالىق تۇرعىدان دايىنداعان جوقپىز - ەربولات دالەنوۆ

بۇل تۋرالى قازاقپارات تىلشىسىنە بەرگەن سۇحباتىندا ق ر پروفيلاكتيكالىق مەديتسينا اكادەمياسىنىڭ اكادەميگى، مەديتسينا عىلىمدارىنىڭ دوكتورى، پروفەسسور ەربولات دالەنوۆ ايتتى.

«كوروناۆيرۋستىڭ ءبىرىنشى تولقىنى بولعان كەزدە ءبىز حالىقتى پسيحولوگيالىق تۇرعىدان دايىنداعان جوقپىز. تەك ول قاشان كەلەدى دەپ كۇتۋمەن بولدىق. اۋرۋدىڭ الدىن الۋ نەمەسە ودان ساۋىعۋ ادام پسيحولوگياسىنا تىكەلەي بايلانىستى. سوندىقتان كوبىمىز بۇل ىندەتتىڭ بار ەكەنىنە سەنبەي، توي- تومالاق ۇيىمداستىردىق. قازىرگى جاعدايدا ادەت-عۇرىپقا سالىنىپ، توي جاساۋ جاناشىرلىقتىڭ بەلگىسى ەمەس - ول مادەنيەتتىڭ تومەندىگى»، - دەدى ق ر پروفيلاكتيكالىق مەديتسينا اكادەمياسىنىڭ اكادەميگى ەربولات دالەنوۆ.

سونداي-اق اكادەميك كوروناۆيرۋستىڭ ەكىنشى تولقىنىنا قاتىستى پىكىر ءبىلدىردى.

«كۇز مەزگىلىندە، اسىرەسە بالالار اراسىندا تۇماۋ كوبەيەدى. ال ول ءوز كەزەگىندە كوروناۆيرۋسقا ۇلاسۋى مۇمكىن. سوندىقتان ىندەتتىڭ جاڭا تولقىنى مەكتەپ جاسىنداعى بالالار اراسىندا ءجيى تاراۋ قاۋپى بار. سونداي-اق، ۆيرۋستى 50 جاستان اسقان ازاماتتار ءجيى جۇقتىرادى. بۇعان قوسا، ءبىراز ۋاقىت ءۇي كارانتينىندە وتىرعان ادامداردىڭ جۇيكەسى جۇقاردى. وسى سەبەپتى ولار دالاعا شىققاندا، وزگەلەرمەن قارىم-قاتىناس جاساعاندا ينفەكتسيانى تەز جۇقتىرۋعا بەيىم. مۇنىڭ الدىن الۋ ءۇشىن قازىرگى تاڭدا س، ە، ا جانە تسينك ۆيتاميندەرىن قابىلداۋ كەرەك. سەبەبى كوروناۆيرۋس ادام اعزاسىنداعى ۇساق تامىرلاردى زاقىمدايدى. ال بۇل دارۋمەندەر تامىر قابىقشاسىن قاتايتۋعا مۇمكىندىك بەرەدى»، - دەپ اتاپ ءوتتى ەربولات دەربىسالى ۇلى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى