شارىن شاتقالىندا ەكوتۋريزمدى دامىتۋعا ينۆەستورلار تارتىلماق

كەڭەس قۇرامىندا عالىمدار، سالانىڭ ساراپشىلارى، تۋريستىك قاۋىمداستىق وكىلدەرى، قوعام بەلسەندىلەرى مەن ەكو- اكتيۆيستەر بار. «شارىن» مەملەكەتتىك ۇلتتىق تابيعي پاركىن دامىتۋ تۇجىرىمداماسى 21 - تامىز كۇنى تانىستىرىلعان بولاتىن. قوعامدىق كەڭەس اتالعان جوبانىڭ جۇزەگە اسۋىن باقىلايتىن بولادى.

جوبادا نەگىزىنەن تۋريستىك مارشرۋتتار مەن سوقپاق جولداردى دامىتۋعا كۇش سالىنادى. زاماناۋي ۆيزيت- ورتالىقتار، گەمپينگ، كەمپينگتەر، ەتنواۋىلدار سالىنادى. كاراۆانينگكە ارنالعان ورىن بولادى. پارك اۋماعىندا كۇردەلى قۇرىلىس جۇرمەيدى، نىساندار جەڭىل جينالاتىن كونسترۋكسيالار ارقىلى تۇرعىزىلادى. وسىلايشا قورشاعان ورتاعا تۇسەتىن جۇكتەمەنى ازايتىپ، ساپالى قىزمەت ۇسىناتىن بىرەگەي تۋريستىك ءونىم جاساۋعا مۇمكىندىك تۋادى.

اۋماقتا ەكوتۋريزمدى جەكە ينۆەستورلاردى تارتۋ ارقىلى دامىتۋ جوسپارلانىپ وتىر:

- ەكى زاماناۋي ۆيزيت- ورتالىق سالىنادى.

- 4 جاياۋ جۇرگىنشى مارشرۋتى بولادى.

- تۇنەيتىن ورىندار دايىندالادى.

- ەتنواۋىل سالىنادى.

- 3 كورۋ الاڭى قويىلادى.

گلەمپينگ، كەمپينگ، كاراۆانينگ پۋنكتتەرى، قوعامدىق تاماقتانۋ ورىندارى، كادەسىي دۇكەندەرى ورنالاستىرىلادى. قورشاعان ورتاعا تۇسەتىن رەكرەاتسيالىق جۇكتەمەنى ازايتۋ ءۇشىن قىزمەت كورسەتۋ نىساندارىنىڭ ءبارى شاتقالدىڭ سىرتىندا سالىنباق. جوبا قوعامدىق كەڭەس مۇشەلەرىمەن تالقىلانىپ، قابىلدانعاننان كەيىن عانا ينۆەستورلار اشىق بايقاۋ نەگىزىندە تارتىلادى. الدىندا ەكولوگيا مينيسترلىگىندە ايتىلعانداي، ۇلتتىق پارك جەرلەرى زاڭ بويىنشا ەشقانداي جاعدايدا جەكە مەنشىككە بەرىلمەيدى. تەك بەلگىلى ءبىر اۋماقتار عانا تۋريزمدى دامىتۋ ماقساتىندا ۋاقىتشا پايدالانۋعا بەرىلۋى مۇمكىن. الايدا ينۆەستور ءوز مىندەتتەرىن ورىنداماعان جاعدايدا مەملەكەت كەز كەلگەن ۋاقىتتا كەلىسىم شارتتى ۇزە الادى.

اۆتور: الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى