قازاقستان مەديتسيناسى كوروناۆيرۋستىڭ ەكىنشى تولقىنىنا دايىن با
بۇل تۋرالى ق ر دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ ايتتى، دەپ حابارلايدى قازاقپارات ءتىلشىسى.
«پاندەميا جاعدايىندا كادر قاجەتتىلىگىن شەشۋ ءۇشىن دەنساۋلىق ساقتاۋ مينيسترلىگى وزەكتى ماسەلەلەر بويىنشا 30 مىڭ مەديتسينا قىزمەتكەرىنە قوسىمشا كۋرستار وتكىزدى. سونىمەن قاتار مەديتسينالىق جوعارى وقۋ ورىندارىنىڭ وقىتۋشىلارى مەديتسينا قىزمەتكەرلەرى ءۇشىن تۇراقتى تۇردە ۆەبينارلار وتكىزۋدە. سوڭعى 4 ايدىڭ ىشىندە رەسپۋبليكالىق بيۋدجەت قاراجاتى ەسەبىنەن جۇقپالى اۋرۋلاردىڭ ەپيدەميولوگياسى جانە بيوقاۋىپسىزدىك، ينفەكسيالىق ەمەس اۋرۋلاردىڭ الدىن الۋ جانە ءتيىمدى ەمدەۋ كۋرستارى بويىنشا 5 مىڭنان استام مەديتسينا قىزمەتكەرى دايىندىقتان ءوتتى. مەديتسينا كادرلارىن قايتا دايارلاۋ كۆوتاسى بويىنشا وسى جىلدىڭ 1- تامىزىنان باستاپ 45 ەپيدەميولوگپەن تولىقتىرىلدى. 1 - قاراشاعا تامان تاعى دا 205 ەپيدەميولوگ پەن 165 جەدەل مەديتسينالىق جاردەم دارىگەرىمەن تولىعاتىن بولادى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
سونىمەن قاتار ونىڭ ايتۋىنشا، بيىلعى جىلعا ارنالعان ءبىلىم بەرۋ تاپسىرىسى اياسىندا جۇقپالى اۋرۋلار، انەستەزيولوگيا مەن رەانيماتولوگيا ماماندىقتارى بويىنشا 200 جانە 240 كولەمىندە مەملەكەتتىك ءبىلىم بەرۋ گرانتتارىن ۇلعايتۋ كوزدەلگەن. رەسەيلىك مامانداردى تارتا وتىرىپ، «COVID-19-دىڭ بارلىق كەزەڭىندە كومەك كورسەتۋ» تاقىرىبى بويىنشا سىرقاتتانۋشىلىق جوعارى 4 ءوڭىردىڭ 200 مەديتسينا قىزمەتكەرى وقىتىلعان.
«ارينە، كەز كەلگەن دارىگەردى دايىنداۋ ءۇشىن ۋاقىت كەرەك. دەگەنمەن، ىندەت ونى كۇتپەيدى. سوندىقتان مەديتسينا قىزمەتكەرلەرىنىڭ سانىن ارتتىرۋ ءۇشىن وسىنداي قادامدارعا باردىق»، - دەدى باعدات قوجاحمەتوۆ.
