اسحات ايماعامبەتوۆ: وقۋلىقتار ازىرلەۋدە ورتاق تالاپ ەنگىزىلدى
«ءبىز وقۋلىقتارعا قاتىستى پروبلەمالاردى ءبىلىپ، سونى شەشۋىمىز كەرەك. بۇگىندە مەكتەپ وقۋلىقتارىنىڭ مازمۇنىنا، وقۋ باعدارلاماسىنا جانە كىتاپتىڭ فورماتىنا دا بايلانىستى سۇراقتار بار. وقۋلىقتاردا جىبەرىلەتىن قاتەلىكتەرگە دە قاتىستى ماسەلەلەر ايتىلۋدا. وسىعان ورايدا وقۋلىقتاردى ازىرلەۋدە ءبىرىڭعاي ورتاق تالاپ ەنگىزىلدى. وقۋلىق ازىرلەۋدە بالالاردىڭ جاس ەرەكشەلىگى، پسيحولوگياسىمەن قاتار مەملەكەتتىك ءتىل ساياساتىن دا ۇمىتپاۋىمىز كەرەك. سونىمەن قاتار، وقۋشىلاردى ەلەكتروندىق وقۋلىقتارمەن قامتاماسىز ەتۋ دە ماڭىزدى»، - دەدى ق ر ءبىلىم جانە عىلىم ءمينيسترى اسحات ايماعامبەتوۆ وقۋلىق ماسەلەلەرىنە ارنالعان ونلاين جيىن بارىسىندا.
سونداي- اق، مينيستر وقۋلىقتاردىڭ ساپاسى مەن مازمۇنىنا قاتىستى سۇراقتار مەن ەسكەرتۋلەر ءجيى كەلىپ تۇسەتىن پاندەردى اتادى.
«بۇگىندە قازاقستان تاريحى ءپانى بويىنشا ورتاق وقۋلىقتىڭ بولۋ ماسەلەسى قولعا الىنۋدا. سەبەبى ەگەمەن ەلىمىزدىڭ تاريحى جازىلعان ورتاق وقۋلىق بولۋى قاجەت دەگەن ۇسىنىس كەلىپ ءتۇستى. سول سياقتى كوركەم ادەبيەت وقۋلىعى بويىنشا دا وزگەرىستەر قاجەت. ەگەر ءبىز سانالى ۇرپاق تاربيەلەيمىز دەسەك، وندا كوركەم ادەبيەتتىڭ ورنى ەرەكشە. بالالاردى تاربيەلەۋدە كوركەم ادەبيەت جەتكىلىكتى ما؟ مەكتەپ كىتاپحانالارىنىڭ بۇگىنگى جاعداي قانداي؟ وسى دۇنيەلەردى كەڭىنەن قاراستىرۋىمىز قاجەت. ودان بولەك، قازاق ادەبيەتى وقۋلىعىنىڭ مازمۇنىنا قاتىستى دا سۇراقتار كوپ. ونىڭ ىشىندە كەيبىر قازاق كلاسسيكتەرىنىڭ كىتاپقا ەنبەي قالۋ ماسەلەسى بار. وسى ايتىلعان دۇنيەلەرگە قاتىستى سۇراقتار مەن ۇسىنىستار بىزگە ءجيى كەلىپ تۇسەدى. بۇگىنگى كەزدەسۋدە وسى جانە وزگە دە وقۋلىقتارعا قاتىستى سۇراقتارعا جاۋاپ قاراستىراتىن بولامىز»، - دەدى ول.
