«سيىر جىلى» كوللەكتسيالىق مونەتاسى اينالىمعا شىعادى

بۇل جونىندە بانكتىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

مونەتالار 8- قىركۇيەكتەن باستاپ ساتىلىمعا تۇسەدى. ولاردى قازاقستان ۇلتتىق بانكىنىڭ بارلىق اۋماقتىق فيليالدارىنان، سونداي-اق ۇلتتىق بانكتىڭ ينتەرنەت-دۇكەنى ارقىلى ساتىپ الۋعا بولادى.

مونەتا ديزاينىندا «شىعىس كۇنتىزبەسى» سۋبۇرقاعىنىڭ (الماتى) ءمۇسىن كومپوزيتسياسىنىڭ بەينەسى پايدالانىلدى.

ءمۇسىن كومپوزيتسياسىنىڭ اۆتورلارى: قازاقستاننىڭ ەڭبەك سىڭىرگەن ونەر قايراتكەرى، سۋرەتشى- مونۋمەنتاليست ۆ. تۆەردوحلەبوۆ ا. تاتارينوۆ جانە ۆ. كاتسيەۆ.

مونەتالاردىڭ اۆەرسىندە اسپان الەمىندەگى جۇلدىزدار كارتاسىندا جۇلدىزدار شوعىرىنىڭ ميفولوگيالىق سيمۆولدارى جانە مونەتا دايىندالعان مەتالدى، ونىڭ سىنامى مەن ماسساسىن بىلدىرەتىن جازۋ بەينەلەنگەن.

مونەتانى اينالدىرا «قازاقستان رەسپۋبليكاسى» جانە «REPUBLIC OF KAZAKHSTAN» دەگەن جازۋلار، كۇننىڭ ستيلدەندىرىلگەن بەينەسى جانە مونەتانىڭ نومينالى بەينەلەنگەن. مونەتالاردىڭ ريەۆەرسىندە ورتالىق بولىگىندە شىعىس كۇنتىزبەسى بويىنشا 2021-جىلدىڭ سيمۆولى - سيىر بەينەلەنگەن.

مونەتانى اينالدىرا «2021»، «شىعىس كۇنتىزبەسى»، «ۆوستوچنىي كالەندار» جانە «ORIENTAL CALENDAR» دەگەن جازۋلار جازىلعان. مونەتالاردىڭ ىشكى جاعىندا شىعىس كۇنتىزبەسىنىڭ قالعان ون ءبىر سيمۆولى ورنالاسقان.

التىن جانە كۇمىس مونەتالار ون ەكى قىرلى جانە ولاردىڭ بەت جانە سىرت جاعىنداعى بەينەلەرى بىردەي. نومينالى 500 تەڭگەلىك كوللەكتسيالىق مونەتالار قازاقستان رەسپۋبليكاسىنىڭ بۇكىل اۋماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا، سونداي-اق بانك شوتتارىنا ەسەپتەۋ ءۇشىن جانە اۋدارىم جاساۋ ءۇشىن قابىلدانۋعا مىندەتتى، قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى.

كوللەكتسيالىق مونەتا قازاقستان تەڭگە سارايىندا دايىندالعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى