اسكەري قىزمەتشى قازاقستاندا العاش رەت ۋلترامارافون باستادى

ول «قاراعاندى - جاڭاارقا» باعىتىن، ياعني 200 شاقىرىمدى 48 ساعاتتا باعىندىرماق، دەپ حابارلايدى قازاقپارات.

ق ر قورعانىس مينيسترلىگىنەن ءمالىم ەتكەندەي، ز. الكەنوۆ مارافوندى كەشە، 2- قىركۇيەك كۇنى ساعات 7.00 دە قاراعاندى قالاسىنداعى اسكەري پوليتسيا ءبولىمىنىڭ باقىلاۋ-وتكىزۋ پۋنكتىنەن باستادى. جوسپار بويىنشا ونى 4- قىركۇيەكتە تۋعان ولكەسى جاڭاارقا اۋدانىندا كۇتىپ الادى.

وفيتسەر مارافون جۇگىرىسىن قاراعاندى گارنيزونىنداعى اسكەري پوليتسيا ءبولىمىنىڭ قۇرىلعانىنا 23 جىل تولۋىنا ارناپ وتىر.

زاڭعار الكەنوۆ قازاق كۇرەسىنەن ق ر سپورت شەبەرى جانە دزيۋدو مەن سامبودان سپورت شەبەرىنە ۇمىتكەر. بۇعان دەيىن ەلىمىزدىڭ قۇراما كومانداسىندا بولعان. ءبىراق العان جاراقاتى مەن وپەراتسيادان كەيىن كۇرەستەگى كاسىبي مانسابىن اياقتاپ، بەسىنشى جىل قاتارىنان ارميا ورتالىق سپورت كلۋبىنىڭ سپورتشىلارىن جاتتىقتىرۋدا. بىرنەشە جىلدان بەرى كوپ شاقىرىمدىق مارافوندارعا قاتىسىپ كەلەدى. ونىڭ ەڭ ۇزىن قاشىقتىعى 130 شاقىرىمدى قۇراعان.

«200 شاقىرىمدىق مارافون ارقىلى ءوز مۇمكىندىكتەرىمدى توزىمدىلىككە تەكسەرەتىن بولامىن»، - دەيدى اسكەري قىزمەتشى.

«جۇگىرىس ناۆيگاتسيالىق پلاتفورمامەن باقىلانىپ تۇرادى. ونلاين رەجيمىندە جۇگىرۋشىنىڭ باعىتى مەن ۋاقىتىن باقىلاۋعا بولادى»، - دەدى مينيسترلىكتەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى