باقىتجان ساعىنتايەۆ قوسىمشا ءبىلىم بەرۋ جۇمىستارى تۋرالى ايتتى
مەملەكەت باسشىسىنىڭ حالىققا جولداۋىندا ايتىلعان تاپسىرمالارىنا سايكەس الماتىدا قالانىڭ بارلىق بالالارىنا قوسىمشا ءبىلىم بەرۋدى قامتاماسىز ەتۋ مىندەتى شەشىلىپ جاتىر.
«قالادا 17 قوسىمشا ءبىلىم بەرۋ ۇيىمى جۇمىس ىستەيدى. ونىڭ ىشىندە وقۋشىلار سارايى، 7 اۋداندىق وقۋشىلار ءۇيى، ونەر مەكتەبى، 8 مۋزىكالىق مەكتەپ بار، وندا 1329 ءتۇرلى ۇيىرمەلەر مەن سەكتسيالار تەگىن جۇمىس ىستەيدى. سونداي- اق، الماتى قالاسى اكىمىنىڭ تاپسىرماسى بويىنشا كەلەر جىلى الاتاۋ جانە ناۋرىزباي اۋداندارىندا وقۋشىلار سارايلارىنىڭ قۇرىلىسىن باستاۋ جوسپارلانعان. الاتاۋ اۋدانىندا 5 سپورتتىق- ساۋىقتىرۋ كەشەنى، تەننيس ورتالىعى سالىنادى. جەتىسۋ اۋدانىندا شىعىس جەكپە- جەگىنىڭ 4 سپورت كەشەنى سالىندى، وندا بالالار تەگىن جاتتىعۋلار جاسايدى. سونىمەن قاتار، مەملەكەتتىك جەكەلىك ارىپتەستىك اياسىندا جەكە ينۆەستيتسيالار ەسەبىنەن 12 مەكتەپتىڭ سپورت الاڭدارى قايتا جاڭعىرتىلدى. مادەنيەت سالاسىندا ورتالىقتاندىرىلعان كىتاپحانا جۇيەسىنىڭ 10 سالالىق كىتاپحاناسى جاڭاردى. بالالاردىڭ قوسىمشا ءبىلىم الۋى ءۇشىن مەملەكەتتىك تاپسىرىستى تەك مەملەكەتتىك ۇيىمداردا عانا ەمەس، سونىمەن قاتار جەكەمەنشىك مەكتەپتەر دە الاتىن بولادى»، - دەدى ب. ساعىنتايەۆ Akimat Live باعدارلاماسىنىڭ تىكەلەي ەفيرىندە.
قالا تۇرعىندارىنىڭ سۇراقتارىنا جاۋاپ بەرە وتىرىپ، قالا اكىمى جەتىسۋ اۋدانى اينابۇلاق-2 ەلدى مەكەنىندەگى «شىڭعا ورلەۋ» الەۋمەتتىك كلۋبىنىڭ جوباسى تۋرالى ايتتى. بۇل جوبانىڭ اۋقىمى كەڭەيتىلىپ، باسقا اۋدانداردا وسىنداي تاعى ءۇش كلۋب اشىلاتىن بولادى.
«وسى ۇسىنىسپەن ۇكىمەتكە شىعاتىن بولامىز. باسقا دا جوبالار ويدا بار. مىسالى بۇرىنعى پەداگوگ ماماندار، زەينەتكەرلەر بالالاردى قوسىمشا وقىتاتىن بولادى. جەتىسۋ اۋدانىندا اشىلعان دومبىرا سىنىبى جەتكىلىكسىز. وسى سياقتى باستامانى باسقا اۋدان اكىمدەرىنە دە تاپسىردىم. كونسەرۆاتوريا تۇلەكتەرىن شاقىرىپ، كاسىپكەرلەردى تارتىپ، دامىتۋعا ىنتالى بولۋ كەرەك. وقىتۋشى بوپ كەلگەن جاس ماماندارعا جاعداي جاساۋ كەرەك. تەك دومبىرا عانا ەمەس، سپورت الاڭدارى تاعى باسقا جوبالار كەرەك. بالالاردى بوس جىبەرىپ قويماساق، جاسوسپىرىمدەر اراسىندا زاڭبۇزۋشىلىق تومەن بولادى»، - دەدى اكىم.
