سەنات كوميتەتتەرىنىڭ جاڭا ءتوراعالارى سايلاندى
سەنات ءتوراعاسى ماۋلەن اشىمبايەۆ پارلامەنت پالاتالارىنىڭ بىرلەسكەن وتىرىسىندا جاريالانعان مەملەكەت باسشىسىنىڭ قازاقستان حالقىنا جولداۋىندا ەلىمىزدىڭ ەكونوميكالىق جانە الەۋمەتتىك دامۋىنىڭ باسىم باعىتتارى ناقتى بەلگىلەنگەنىن اتاپ ءوتتى.
«مەملەكەت باسشىسى ەكونوميكا، الەۋمەتتىك، ساياسي سالالارعا قاتىستى الداعى باسىمدىقتاردى ايقىنداپ بەردى. پرەزيدەنتىمىز ەكونوميكالىق ءوسىمدى قالپىنا كەلتىرۋ، حالىقتىڭ ءال- اۋقاتىن ارتتىرۋ، قۇقىق قورعاۋ جۇيەسىن ءارى قاراي جاڭعىرتۋ، ساياسي رەفورمالاردى جالعاستىرۋ ماسەلەلەرىنە توقتالىپ، پارلامەنت پەن ۇكىمەتتىڭ الدىنا ناقتى مىندەتتەر قويدى. جولداۋدا ايتىلعان تاپسىرمالاردى زاڭنامالىق تۇرعىدان ۋاقتىلى ءارى ساپالى قامتاماسىز ەتۋ - ءبىزدىڭ نەگىزگى مىندەتىمىز «، - دەدى سەنات ءتوراعاسى.
ماۋلەن اشىمبايەۆ سەناتورلار وڭىرلەردەگى جاعدايعا مونيتورينگ جۇرگىزىپ، حالىقتى الاڭداتقان وزەكتى ماسەلەلەردى شەشۋگە اتسالىسقانىنا نازار اۋداردى.
جاز بويى ەلىمىزدەگى جانە الەمدەگى ەپيدەميولوگيالىق احۋال كۇردەلى بولعانى بەلگىلى. پرەزيدەنتتىڭ تاپسىرماسى بويىنشا قاجەتتى قاراجات ءبولىنىپ، ءتيىستى زاڭنامالىق اكتىلەر قابىلداندى.
«قازىر جاعدايدىڭ تۇراقتالىپ كەلە جاتقانىن كورىپ وتىرمىز. ءبىراق پرەزيدەنتىمىز ايتىپ وتكەندەي، سانيتارلىق، ەپيدەميولوگيالىق رەجيمگە، ساقتىق شارالارىنا باسا ءمان بەرۋىمىز كەرەك. وسى جولدا دەپۋتاتتار مەملەكەت باسشىسىنىڭ تاپسىرمالارى اياسىندا قاجەتتى زاڭدار قابىلداۋ جۇمىسىن جالعاستىراتىن بولادى»، - دەدى ماۋلەن اشىمبايەۆ.
سەنات الداعى ۋاقىتتا جاڭا دەپۋتاتتىق قۇراممەن جۇمىس ىستەيدى. ناقتى ايتقاندا، 2020 -جىلدىڭ 12 تامىزىندا سەنات دەپۋتاتتارىنىڭ سايلاۋى ءوتىپ، ونىڭ قورىتىندىسى بويىنشا ولگا پەرەپەچينا، ءالي بەكتايەۆ، سەرگەي ەرشوۆ جانە ايگۇل قاپباروۆا جاڭا مەرزىمگە قايتا سايلاندى. سونداي- اق، سەناتورلار قاتارىنا جاڭادان 13 دەپۋتات قوسىلدى. پالاتانىڭ بۇگىنگى وتىرىسى كەزىندە ولار انت قابىلدادى.
ءوز كەزەگەندە سەنات ءتوراعاسى جاڭادان سايلانعان دەپۋتاتتاردىڭ قىزمەتىنە تابىس تىلەپ، كاسىبي بىلىكتىلىكتەرى مەن مول تاجىريبەلەرىن زاڭ شىعارۋ قىزمەتىندە كەڭىنەن پايدالاناتىنىنا جانە سەنات جۇمىسىنا تىڭ سەرپىن بەرەتىندەرىنە سەنىم ءبىلدىردى.
سونىمەن قاتار وتىرىس بارىسىندا سەنات ءتوراعاسىنىڭ ورىنباسارى بولىپ نۇرلان ءابدىروۆ سايلاندى. ودان بولەك، جوعارعى پالاتا كوميتەتتەرىنىڭ قۇرامى بەلگىلەنىپ، ولاردىڭ ءتوراعالارى سايلاندى. اتاپ ايتقاندا، كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ ءتوراعاسى بولىپ ۆلاديمير ۆولكوۆ؛ قارجى جانە بيۋدجەت كوميتەتىنىڭ ءتوراعاسى بولىپ ولگا پەرەپەچينا؛ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى بولىپ مۇحتار قۇل- مۇحاممەد؛ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ ءتوراعاسى بولىپ داۋرەن ادىلبەكوۆ؛ الەۋمەتتىك- مادەني دامۋ جانە عىلىم كوميتەتىنىڭ ءتوراعاسى بولىپ مۇرات باقتيار ۇلى؛ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ ءتوراعاسى بولىپ ءالي بەكتايەۆ سايلاندى.
