ومارحان وكسىكبايەۆ: ەل ەكونوميكاسىنىڭ ۇشتەن ءبىر بولىگى - كولەڭكەلى ەكونوميكا
ق ر ءماجىلىسىنىڭ دەپۋتاتى ومارحان وكسىكبايەۆ مەملەكەت باسشىسىنىڭ بۇگىنگى جولداۋىنا قاتىستى وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«مەملەكەت باسشىسى ەكونوميكامىزدا كولەڭكەلى ەكونوميكانىڭ ۇلەسى ۇلكەن ەكەنىن ايتىپ ءوتتى. ول ەكونوميكامىزدىڭ ۇشتەن ءبىرى - كولەڭكەلى ەكونوميكا ەكەنىنە، ونىڭ ءقاۋىپ- قاتەرىنە جانە سىبايلاس جەمقورلىققا اكەپ وتىرعانىنا باسا نازار اۋداردى. ول قۇقىق قورعاۋ ورگاندارىنىڭ باستى جۇمىسى - كولەڭكەلى ەكونوميكامەن كۇرەس بولۋى كەرەكتىگىن ايتتى. بۇل - وتە دۇرىس تاپسىرما. وسى ماسەلەنى شەشىپ الساق، اشىقتىق ارقىلى ەكونوميكامىزدىڭ دامۋ ءۇردىسىن كورەر ەدىك»، - دەيدى ق ر ءماجىلىسىنىڭ دەپۋتاتى ومارحان وكسىكبايەۆ.
ول مەملەكەت باسشىسىنىڭ تەڭگەنى ءبىر قالىپقا كەلتىرۋ ماسەلەسىن قوزعاعانىنا توقتالىپ ءوتتى.
«تەڭگەنىڭ تۇراقسىزدىعى بيزنەستىك ينۆەستيتسيا جاساۋعا ۇمتىلىستىڭ جوقتىعىنا، شەتەلدىك ينۆەستورلاردىڭ سەنىمسىزدىك تانىتۋىنا اكەلىپ وتىرعانى بەلگىلى. وسى ماسەلەنىڭ ءبارىن دەر كەزىندە شەشە الساق، بۇل ەرتەڭگى كۇنى تەڭگەمىزدىڭ تۇراقتانۋىنا جانە ينۆەستيتسيالىق كليماتتىڭ قالىپقا كەلۋىنە سەپتىگىن تيگىزەر ەدى. سونداي- اق، ەلىمىزدە زاڭ اياسىندا قىرىققا جۋىق سالىق پەن تۇسىمدەر بار ەكەنى بەلگىلى. مەملەكەت باسشىسىنىڭ تاپسىرماسىمەن ونى وڭتايلاندىرىپ، ناقتىلاپ، ەكونوميكاعا جۇمىس ىستەيتىن جانە بيۋدجەتكە ءوز مۇقتاجىن شەشەتىن جاعداي تۋعىزۋ كوزدەلىپ وتىر»، - دەيدى ول.
اۆتور: زارينا قاھارمان
