قازاق قوعامىندا جاڭا قاعيداتتار جانە جاڭا باعدارلار سالتانات قۇرۋعا ءتيىس - مەملەكەت باسشىسى
بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا جىل سايىنعى ءداستۇرلى جولداۋىندا ءمالىم ەتتى، دەپ حابارلايدى قازاقپارات ءتىلشىسى.
«ازاماتتارىمىز رەفورمالارعا قولداۋ بىلدىرەدى دەپ سەنەمىن. ايتىلعان بارلىق رەفورمالاردىڭ، وزگەرىستەردىڭ تابىستى جۇزەگە اسۋى بارشامىزدىڭ بىرلىگىمىزگە، وتانشىلدىعىمىزعا جانە ازاماتتىق جاۋاپكەرشىلىگىمىزگە بايلانىستى» - دەدى پرەزيدەنت.
سونىمەن قاتار قاسىم-جومارت توقايەۆ ۇلت ساپاسىن ارتتىرۋ تاقىرىبىنا توقتالدى.
«قازىرگى مىندەت - حالقىمىزدىڭ جاڭا بولمىسىن قالىپتاستىرۋ، تۇتاس ۇلت ساپاسىن ارتتىرۋ. ادامدى جانە قوعامدى ۋاقىت تالابىنا ساي جەتىلدىرۋ قاجەتتىگىن ءومىردىڭ ءوزى كورسەتىپ وتىر. جاڭارعان ۇلت قانا جاڭعىرعان ەلدىڭ جەتىستىگىن جاھان جۇرتىنا تانىتا الادى. مەن حالقىمىزدىڭ الەم ۇلگى تۇتارلىق جاقسى قاسيەتتەرىنىڭ كوبىرەك بولعانىن قالايمىن. ۇلتىمىز جاڭا ساپاعا كوشۋى ءۇشىن ءبىزدىڭ كۇندەلىكتى ومىرلىك ۇستانىمدارىمىز دا وزگەرۋى كەرەك. قازاق قوعامىندا جاڭا قاعيداتتار جانە جاڭا باعدارلار سالتانات قۇرۋعا ءتيىس»، - دەدى مەملەكەت باسشىسى.
وسى ورايدا ق. توقايەۆ 21-عاسىردىڭ ۇرپاعى تەرەڭ ءبىلىمدى بولۋى ءتيىس ەكەنىن اتاپ ءوتتى.
«ەكىنشىدەن، جاس بۋىندى ەرىنبەي ەڭبەك ەتۋگە بەيىمدەۋ قاجەت. ۇشىنشىدەن، كەز كەلگەن ءىستى كاسىبي داعدى ارقىلدى جۇزەگە اسىرعان دۇرىس. تورتىنشىدەن، تەمىردەي ءتارتىپ جانە جوعارى جاۋاپكەرشىلىك بارشامىزدىڭ بويىمىزدا بولۋى كەرەك. بەسىنشىدەن، ادىلدىكتەن اينىماعان ءجون. ادىلدىك - قوعام دامۋىنىڭ ماڭىزدى شارتى. ادىلەتتىلىك - اسىرەسە، ەل- جۇرتتىڭ تاعدارىن شەشۋ ءۇشىن اسا قاجەت قاسيەت. التىنشىدان، بىزگە كەرەگى ادالدىق، ۇقىپتىلىق، تياناقتىلىق. ءبارىمىز ناعىز قازاقتى ءدال وسىنداي كەيىپتە كورگىمىز كەلەدى. ءبىز سوندا عانا باسەكەگە قابىلەتتى مەملەكەت، زياتكەر ۇلت قالىپتاستىرا الامىز. قازاق زيالىلارىنىڭ جاڭا كەزەڭدەگى مىندەتى - ۇلت بولمىسىنىڭ جاڭا قاعيداتتارىن ورنىقتىرۋ، سونداي-اق ۇلت ساپاسىن ارتتىرۋعا اتسالىسۋ»، - دەدى پرەزيدەنت.
مەملەكەت باسشىسى جاڭعىرعان قوعام جات ادەتتەردەن بىرتىندەپ ارىلۋى كەرەكتىگىن ايتتى.
«ىسىراپشىلدىق پەن داڭعازالىق قوعامنىڭ دا، ادامنىڭ دا ابىرويىن توگەدى. جاۋاپسىزدىق، نەمقۇرايلىلىق بۇكىل ەلدى قاسىرەتكە ۇشىراتادى. ال بوس سوزدىلىك پەن بوسپەلىك، ماقتانشاقتىق قوعامنىڭ دامۋىن تەجەيدى»، - دەدى مەملەكەت باسشىسى.
اۆتور: رۋسلان عابباسوۆ
