دارىگەرلەرگە العىس: ەلورداداعى كوپىرگە مەدقىزمەتكەرلەردىڭ سۋرەتتەرى ءىلىندى
اق حالاتتى ابزال جانداردىڭ ەتكەن ەڭبەگى باعاسىز، سول سەبەپتى ولارعا دەگەن العىستى اركىم ءارتۇرلى كورسەتۋدە: ءبىرى ءان ارناسا، ءبىرى بەينەبايان ءتۇسىرىپ، ەندى ءبىرى ءارتۇرلى يلليۋستراتسيالار ارنادى.
كاسىبي فوتوگراف رۋسلان مازۋنين دە مەديتسينالىق قىزمەتكەرلەرگە ەرەكشە تاسىلمەن العىس ءبىلدىردى. ول قازىرگى ۋاقىتتاعى ناعىز كەيىپكەرلەر كىم ەكەنىن ءبىلىپ ءجۇرۋىمىز ءۇشىن دارىگەرلەردىڭ سۋرەتتەرىن ەلورداداعى كوپىرلەردىڭ بىرىنە ءىلىپ قويدى، دەپ حابارلايدى قازاقپارات ءتىلشىسى.
رۋسلان مازۋنين فوتوسۋرەتكە تۇسىرۋمەن 12 جىلدان اينالىسىپ كەلەدى. كوروناۆيرۋس ءورشىپ تۇرعان كەزدە دە جۇمىسىن توقتاتپاعان. ىندەتپەن كۇرەس ايلارىندا ول دارىگەرلەردىڭ قۋانىشىن دا، قايعىسىن دا، ناۋقاستاردىڭ ءومىرىن قۇتقارىپ قالۋ ءۇشىن جانىن اياماعانىن دا كورگەنىن ايتتى. رۋسلان زاماناۋي فرانتسۋز سۋرەتشىسى JR پاريجدەگى وپەرا تەاترىنىڭ قاسبەتىنە دارىگەرلەردىڭ سۋرەتىن سالعانىن كورىپ، شابىت العان جانە ءوزى دە دارىگەرلەرگە العىس ايتۋدى ءجون دەپ تاپقان.
«مەن ەشقانداي ەرەكشە نارسە ويلاپ تاپقان جوقپىن. وسىعان ۇقساس نارسەنى شەتەلدەن كورگەنمىن. مەنى شەتەلدەگى ادامدار دارىگەرلەرگە العىسىن قالاي جەتكىزەتىنى تاڭ قالدىراتىن. سول كەزدە ء«بىز نەگە وسىلاي ەرەكشە ىقىلاس بىلدىرە المايمىز؟» دەپ ويلادىم.
سوڭعى التى ايدا بولعان جاعداي ءار ادامنىڭ جۇرەگىندە ءىز، جازىلماس جارا قالدىرىپ كەتكەنى ءسوزسىز. ءبىراق مەن ءۇمىتتىڭ نىشانى رەتىندە، ءبارى جاقسى بولاتىنىنا سەنۋ رەتىندە دارىگەرلەردىڭ كوڭىلدى ساتتەرىن سۋرەتكە ءتۇسىرىپ العىم كەلدى. ەكى اپتا بۇرىن نۇر- سۇلتان قالاسى اكىمدىگىنىڭ ش ج ق «كوپسالالاى مەديتسينا ورتالىعىنا» بارىپ، فوتوسۋرەت ءتۇسىرۋدىڭ ءساتى ءتۇستى. جۇمىس بارىسىندا مەن تۇسىرگەن ءار سۋرەت مەديتسينا قىزمەتكەرلەرىنىڭ كوڭىلىنەن شىققانىن قالادىم. سانيتار، مەدبيكە، رەانيماتولوگ، فەلدشەر، ينفەكسيونيست، دارىگەر - ولاردىڭ ءبارى ادام جانىن اراشالاپ قالۋ ءۇشىن كۇرەسەدى»، - دەيدى فوتوگراف رۋسلان مازۋنين.
ول فوتوسۋرەتتەردى ءتۇسىرىپ بولعاننان كەيىن شاعىن ۆيدەو جاساپ، instagram پاراقشاسىندا ءبولىستى جانە «جۋرنالدىڭ مۇقاباسىندا وسىنداي ناعىز كەيىپكەرلەر تۇرۋىنا قالاي قارايسىزدار؟» دەپ جازدى.
بۇل سوزدەر ءار قازاقستاندىقتىڭ كوڭىلىنە قۋانىش ۇيالاتتى. وقىرماندار ونىڭ ۆيدەوسىمەن ءبولىسىپ، پىكىر جازىپ، ءلۇپىل باسىپ، اقىرى دەمەۋشىلەردىڭ، دالىرەك ايتقاندا قۇرىلىس كومپانياسىنىڭ، پوليگرافيا جانە ەلوردالىق اكىمدىكتىڭ نازارىن اۋداردى. ولار فوتوگرافتىڭ ويىن جۇزەگە اسىرۋعا قول ۇشىن سوزىپ، فوتوكورمە ۇيىمداستىرىپ بەردى.
«فوتوسۋرەتتەن شىنايى كۇلىمسىرەپ تۇرعان دارىگەرلەردى كورەسىزدەر. شىن مانىندە ءارتۇرلى ەموتسيانى كورۋگە بولادى. كەي دارىگەر «كۇلىمسىرەمەي-اق تۇسۋگە بولا ما؟» دەپ سۇرادى. اعا بۋىن دارىگەرلەر فوتوعا بايىپتى، سالماقتى قالىپتا ءتۇسىپ ۇيرەنىپ قالعان. ولار جۇرگەن سالا ماڭىزدى جانە جاۋاپكەرشىلىگى مول بولعاندىقتان تاۋلىك بويى ەڭبەك ەتەدى، سايكەسىنشە ءجيى كۇلىمسىرەۋگە ۋاقىتتارى جا جوق شىعار. مەن بار كۇش-جىگەرىمدى سالىپ، ولاردىڭ جۇزىندەگى قۋانىش لەبى وسىنداي قيىن- قىستاۋ كەزەڭدە ءار قازاقستاندىقتىڭ جۇرەگىنە ءۇمىت وتىن سىيلايتىنداي ەتىپ فوتوسۋرەتكە ءتۇسىردىم»، - دەيدى فوتوگراف.
«ريزامىز» دەپ اتالاتىن فوتوكورمەدە مەديتسينا قىزمەتكەرلەرىنىڭ 101 فوتوسۋرەتى قويىلعان. فوتوگراف يدەياسى قازاقستاندىقتار تاراپىنان قولداۋ تاپقانى ءۇشىن شىعارماشىلىق ادامى رەتىندە قۋانىپ قالعان. ونىڭ Instagram پاراقشاسىنا جاريالاعان ۆيدەوسىنا العىس ايتۋ سيپاتىنداعى پىكىرلەر كوپ جازىلعان.
«فوتوسۋرەتتەر - ءبىز سىرت ەتكىزىپ ءتۇسىرىپ ۇلگەرگەن ءومىردىڭ ءبىر بولشەگى، ءبىر ءساتى. مەديتسينا قىزمەتكەرلەرىنىڭ فوتوسۋرەتتەرى - كوروناۆيرۋس ىندەتىن جەڭەمىز دەگەن ءۇمىت»، - دەيدى ول. دارىگەرلەر فوتوگرافقا ەڭبەگىن ەلەپ-ەسكەرگەنى ءۇشىن ريزاشىلىقتارىن ءبىلدىردى.
«بۇرىن بۇل وتە مارتەبەلى ماماندىق بولعان. دارىگەرلەر قازىرگى قوعامدا دا بەدەلىن جوعالتىپ الماعانىن قالايمىن. بالالار وسكەندە دارىگەر بولۋدى ارمانداپ، ەرەسەك بۋىن بۇل ماماندىققا ەرەكشە قۇرمەتپەن قاراعانى جاقسى ەمەس پە. كەيدە وقىرماندار «دارىگەر بولۋ قانداي كەرەمەت»، «دارىگەرلەر - بەيبىت ءومىردىڭ باتىرلارى» دەگەن سياقتى پىكىر جازادى. دەمەك، مەنىڭ ماقساتىم ورىندالىپ كەلەدى»، - دەيدى فوتوگراف.
ول بۇل جەتىستىگىمەن توقتاپ قالعىسى كەلمەيتىنىن، وسىنداي فوتوكورمەلەر ەلىمىزدىڭ باسقا دا وڭىرلەرىندە ۇيىمداستىرىلسا جاقسى بولاتىنىن ايتتى.
اۆتور: زارينا قاھارمان
