بەلارۋستەگى نارازىلىق: جاستاردى ارميامەن قورقىتتى

جەرگىلىكتى ۋاقىت بويىنشا ساعات 18:00 گە قاراي مينسك تۇرعىندارى بەيبىتشىلىك الاڭىنداعى پراۆوسلاۆ اۋليە دۋحول شىركەۋىنەن تاۋەلسىزدىك الاڭىنداعى كاتوليكتەردىڭ قىزىل حرامىنا دەيىن شەرۋگە شىقتى. اكسياعا 26- تامىزدا ومون قىزمەتكەرلەرىنىڭ تاۋەلسىزدىك الاڭىنداعى قىزىل حرامنان ادامداردى شىعارماۋى سەبەپ بولعان. «مبح مەديا» مالىمەتىنشە، شەرۋگە كەم دەگەندە ەكى مىڭ ادام قاتىسقان.

تاۋەلسىزدىك الاڭىنداعى كوشەلەر جابىلا باستادى. جەر استى وتەتىن جولدارعا مەتالل بوگەت قويىلدى. Tut.by حابارلاۋىنا قاراعاندا، ميتينگكە شىققانداردىڭ الدىنان فورما جانە ماسكا كيگەن ميليتسەيلەر، ومون قىزمەتكەرلەرى تىزبەكتەلىپ شىققان. سونداي-اق اۆتوزاك پەن ميكرواۆتوبۋستار بولعان. نارازىلىق بىلدىرگەندەرگە زاڭدى بۇزىپ جاتىرسىڭدار دەگەن ەسكەرتۋ ايتىلعان.

سوسىن قارۋلى كۇشتەر الاڭدى قورشاپ الدى جانە ادامداردى شىعارمادى. قورشاۋدا مىڭعا جۋىق ادام قالعان. شەرۋگە شىققانداردىڭ كوبى جانە جۋرناليستەر ۇستالدى. اراسىندا رەسەيلىك ب ا ق وكىلدەرى دە بار.

«ۆەسنا» قۇقىق قورعاۋشىلارىنىڭ سوڭعى مالىمەتى بويىنشا، اكسيا كەزىندە 153 ادام ۇستالعان. رەسەيلىك جۋرناليستەردى كونسۋل كەلگەن سوڭ بوساتتى، دەپ جازادى «م ب ح مەديا».

«بەلتا» مالىمەتىنشە، 27- تامىزدا ەل پرەزيدەنتى الەكساندر لۋكاشەنكو ميتينگكە قاتىسىپ جاتقان ستۋدەنتتەرگە اسكەردى كەيىنگە قالدىرۋعا مۇمكىندىك بەرمەيتىنىن مالىمدەدى.

«وقىعىسى كەلەتىن ادام وقيدى، كەيىنگە شەگەرۋگە مۇمكىندىك بەرىلەدى. كىم كوشەگە شىعادى نەمەسە وقىعىسى كەلمەيدى، زاڭ بويىنشا شارا قابىلدايمىز»، - دەدى لۋكاشەنكو مينسكىدە وتكەن وتىرىستا.

سونداي-اق لۋكاشەنكو وپپوزيتسيانىڭ وكرۋگتەردەگى دەپۋتاتتاردى شاقىرۋ تالابىنا قاتىستى پىكىر ءبىلدىردى.

«دەپۋتاتتارعا كوشتى. تىڭداڭىزدار، ولاردىڭ نە كىناسى بار؟ سايلاۋ ءوتتى، دەپۋتاتتاردى تاڭدادىڭىزدار، ءبارى كەلىستى. دەپۋتاتتاردى شاقىرتامىز... شاقىرىپ كورىڭدەر. ءتۇسىنىپ تۇرمىز: پرەزيدەنتتى قۇلاتا المادى، ەندى پارلامەنتتى قۇرتۋ كەرەك»، - دەدى پرەزيدەنت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى