نە سەبەپتى كوروناۆيرۋسپەن اۋىرعان مەديكتەردىڭ ءبارى وتەماقى المايدى - ەڭبەك مينيسترلىگىنىڭ جاۋابى
ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترىنىڭ ايتۋىنشا، كوروناۆيرۋسپەن اۋىرعان 800 دەن استام دارىگەر مەن مەديتسينالىق قىزمەتكەر 2 ميلليون تەڭگە كولەمىندە وتەماقى العان. كوروناۆيرۋس سالدارىنان قايتىس بولعان مەديتسينا قىزمەتكەرلەرىنىڭ وتباسىلارىنا 10 ميلليون تەڭگە تولەنگەن ءۇش جاعداي بولدى.
«وتەماقى الۋ تۋرالى وتىنىشتەر وتە كوپ. باستى ماسەلە - دەنساۋلىق ساقتاۋ باسقارماسى دەڭگەيىندەگى كوميسسيا ەلەكتروندى جۇيەگە ءوتىنىش بەرگەن كەزدە بانكتىك دەرەكتەمەلەردى قاتە كورسەتەدى. ەڭبەك مينيسترلىگىنىڭ جۇيەسى دەرەكتەمەنىڭ دۇرىس-بۇرىستىعىن، بانكتىك ەسەپشوتتى تەكسەرىپ، ءبىر سان جەتپەي تۇرسا نەمەسە دەرەكتەمە دۇرىس بولماعان جاعدايدا ءوتىنىشتى كەرى قايتارادى. دەرەكتەمە دۇرىس بولماسا اقشا قايدا تۇسەدى؟»، - دەيدى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ.
ول وتەماقى بەرىلمەۋدىڭ تاعى ءبىر سەبەبى - دياگنوزدىڭ قاتە قويىلۋى ەكەنىن ايتتى.
«ولار وزدەرىنىڭ COVID-19-بەن اۋىرعانىن كورسەتەدى، ال دەنساۋلىق ساقتاۋ مينيسترلىگىنىڭ جۇيەسى ول كوروناۆيرۋسپەن اۋىرماعاندىعىن كورسەتەدى. تەكسەرۋ كەزىندە انىقتالىپ، ءوتىنىش قايتا قاراۋ ءۇشىن قايتارىلادى. دەنساۋلىق ساقتاۋ مينيسترلىگىمەن بىرلەسە وتىرىپ بۇل جۇمىستى باستاعان العاشقى كۇندەرى كوپتەگەن ماسەلە تۋىندادى. ولار مۇنى قالاي تەكسەرۋ كەرەكتىگىن بىلمەي، ترەنينگتەر وتكىزىلىپ، ءتۇسىندىرۋ جۇمىستارى جۇرگىزىلدى. قازىرگى ۋاقىتتا بۇل جۇمىس الدەقايدا ساپالى جاسالۋدا، ءوتىنىش بەرۋشىلەر سانى دا ارتىپ كەلەدى. بۇل جاعدايدى كۇندەلىكتى باقىلاپ وتىرمىز»، - دەيدى ول.
ۆيتسە-مينيستر وسى ماسەلەگە قاتىستى جەمقورلىق تاۋەكەلى بولۋى مۇمكىن بە ەكەنى تۋرالى جاۋاپ بەردى. «بۇل جاعدايدا سىبايلاس جەمقورلىقتىڭ بار- جوعىن انىقتاۋ قيىن. مەنىڭ ويىمشا، كوميسسيا نەمەسە سول دەڭگەيدە شەشىم قابىلدايتىن ادامدار... مۇنى ادامدار تاراپىنان كەتكەن قاتەلىكتەر دەپ تۇسىندىرۋگە بولادى. ولار تەحنيكالىق تۇرعىدا قاتەلەسىپ كەتۋى مۇمكىن. ءبىز كوروناۆيرۋسپەن اۋىرعان مەديتسينالىق قىزمەتكەرلەر كوپ ەكەنىن جانە ولاردىڭ بارلىعىنا مەملەكەت بەلگىلەگەن ءتيىستى قارجىلاي كومەك قاجەت ەكەنىن تۇسىنەمىز. ءبىز بۇل جۇمىستى ءوزىنىڭ لوگيكالىق قورىتىندىسىنا جەتكىزەمىز»، - دەيدى ەربول وسپانوۆ.
