قازاقستاندا دارىگەرلەردىڭ بالالارىنا ارنالعان قايىرىمدىلىق جوباسى جۇزەگە اسۋدا
كوروناۆيرۋس ىندەتىنىڭ العاشقى كۇندەرىنەن باستاپ مەديتسينا قىزمەتكەرلەرى ءاردايىم الدىڭعى قاتاردا جانە مىڭداعان ادامداردىڭ ءومىرى ءۇشىن كۇرەس جۇرگىزۋدە.
بۇل ىندەت كەزىندە مەديتسينا قىزمەتكەرلەرى ءوز وتباسىلارى مەن بالالارىنان الىس قالۋدا. ق ر مادەنيەت جانە سپورت مينيسترلىگى دارىگەرلەردىڭ بالالارىن قولداۋ ماقساتىندا «پايدالى بوس ۋاقىت» مادەني ءبىلىم بەرۋ جوباسىن جۇزەگە اسىرۋدا، دەپ حابارلايدى قازاقپارات ءتىلشىسى. «مەديتسينا قىزمەتكەرلەرىنىڭ ەڭبەگى - ناعىز ەرلىك. توتەنشە جاعداي، شامادان تىس جۇكتەمە، بىرنەشە ساعاتتىق اۋىسىم، جۇقتىرعاندار اراسىندا قيىن جۇمىس. ءبىراق ەڭ باستىسى - كوروناۆيرۋس ىندەتى كەزىندە مەديتسينا قىزمەتكەرلەرى ءوز وتباسىلارى مەن بالالارىنان الىس قالۋدا. بۇل سىناق مەديتسينا قىزمەتكەرلەرىنىڭ بالالارىنا دا وڭاي بولعان جوق. كارانتين كەزىندە مەكتەپتەر، ۇيىرمەلەر مەن دامۋ ورتالىقتارى جۇمىسىن ۋاقىتشا توقتاتقانىن ەسكەرەر بولساق، دارىگەرلەردىڭ بالالارى ەرەكشە نازار اۋدارۋدى قاجەت ەتەدى»، - دەيدى ق ر مادەنيەت جانە سپورت مينيسترلىگىندەگىلەر.
دارىگەرلەردىڭ بالالارىن قولداۋ زامانىمىزدىڭ باتىرلارىنا كومەكتەسۋدىڭ ءتيىمدى تاسىلدەرىنىڭ ءبىرى. ءدال وسىنداي جوبا ق ر مادەنيەت جانە سپورت مينيسترلىگىنىڭ باستاماسىمەن جۇزەگە اسىرىلۋدا.
«يگىلىك ءۇشىن بوس ۋاقىت» اتتى جاڭا مادەني- ءبىلىم بەرۋ جوباسى اياسىندا بۇكىل ەلدەگى مەديتسينا قىزمەتكەرلەرىنىڭ بالالارى ونلاين رەجيمىندە تەگىن ءبىلىم الۋدا. ءباسپاسوز قىزمەتىندە حابارلانعانداي، بالالار ونەر جانە سپورت سالاسىنداعى پاندەرىن وقۋدا. بالالارعا كەسكىندەمە، اكتەرلىك شەبەرلىك، دومبىرا، گيتارا، فورتەپيانو، ەسترادالىق ءان، سكريپكا، ەركىن كۇرەس، بوكس، دزيۋدو، گيمناستيكا، توعىزقۇمالاق سياقتى كوپتەگەن پاندەر ۇسىنىلعان.
«وسىنداي جان-جاقتى تاڭداۋدىڭ ارقاسىندا دارىگەرلەردىڭ بالالارى كارانتيندىك دەمالىس كەزىندە باي مادەني دەمالىسپەن قامتاماسىز ەتىلگەن دەپ سەنىمدى تۇردە ايتا الامىز»، - دەلىنگەن ق ر مادەنيەت جانە سپورت مينيسترلىگىنىڭ باسپا ءسوز حابارلاماسىندا. ارنايى جوبا ءۇشىن ءبىلىم الۋدىڭ ىڭعايلىلىعى مەن وقۋشىلاردىڭ اۆتوريزاتسياسىنىڭ جەدەلدىگىن قامتاماسىز ەتەتىن جالپىعا قولجەتىمدى ءبىلىم بەرۋ پلاتفورماسى قۇرىلدى.
جوبا اياسىندا ەلىمىزدىڭ ءارتۇرلى وبلىستارى مەن وڭىرلەرىنەن 9-15 جاس ارالىعىنداعى 186 وقۋشى ءبىلىم الۋدا. ونلاين فورماتتاعى ءوزىن-ءوزى دامىتۋمەن بالالار توپتىق جانە جەكە ونلاين ساباقتاردا اينالىسا الادى. وقۋشىلار تانىمدىق شەبەرلىك ساباقتارىنا بەلسەندى قاتىسادى.
شەبەرلىك ساباقتارىن كوپتەگەن ونەر جانە سپورت ماماندارى وتكىزدى. ولاردىڭ ىشىندە: ق ر حالىق ءارتىسى، قازاقستاننىڭ ەڭبەك ەرى ايمان مۇساقوجايەۆا، باعىم مۇحيتدەنوۆا، ەرماحان يبرايموۆ، ەلدوس سمەتوۆ، ءانۋار سادىقوۆا، بايان قاجنابيەۆا، ماقسات مەدەۋبەك جانە ت. ب. ونەر جانە سپورت قايراتكەرلەرى بار.
«يگىلىك ءۇشىن بوس ۋاقىت» جوباسى دارىگەرلەر مەن ولاردىڭ بالالارى اراسىندا بىردەن وڭ باعالاندى. جوبا تۋرالى ءوزىنىڭ پىكىرلەرىن ەلدىڭ ءارتۇرلى ايماقتارىنان دارىگەرلەر جىبەرەدى. مەديتسينالىق اتا-انالار جوبا وقىتۋشىلارىنا ءار بالانىڭ ىنتاسى مەن قولداۋى ءۇشىن، بالالاردىڭ شىعارماشىلىق جانە سپورتتىق الەۋەتىن اشۋعا كومەكتەسكەنى ءۇشىن العىس بىلدىرۋدە. بالالار، ءوز كەزەگىندە، ساباقتار تۋرالى جاعىمدى اسەرلەرىمەن بولىسۋدە. مينيسترلىكتە اتاپ وتكەندەي، «پايدالى بوس ۋاقىت» جوباسىنىڭ كومەگىمەن مادەنيەت جانە سپورت قايراتكەرلەرى مىڭداعان قۇتقارىلعان ومىرلەرى ءۇشىن دارىگەرلەرگە ءوز ريزاشىلىقتارىن ءبىلدىرىپ، ولاردى قولداۋعا تىرىسادى.
وسىلايشا، كوروناۆيرۋس ىندەتى دارىگەرلەر مەن مادەنيەت جانە سپورت قىزمەتكەرلەرىن بىرىكتىرۋدە. بالالاردى قولداۋ، ارينە، كۇن سايىن ەل ازاماتتارىنىڭ دەنساۋلىعى ءۇشىن ەرلىك جاسايتىن اتا- انالارىنىڭ جۇمىسىنا جاعىمدى اسەر ەتەدى.
ەسكە سالا كەتسەك، ەلىمىزدە «پايدالى بوس ۋاقىت» دەپ اتالاتىن جاڭا جوبا ىسكە قوسىلعانىن جازعان بولاتىنبىز. جاڭا باستامانىڭ باستى ەرەكشەلىگى - بالالار قىزىعۋشىلىعى بويىنشا ونلاين ساباقتى وزدەرى تاڭداي الادى.
اۆتور: زارينا قاھارمان
