ا ق ش جازۋشىسى جەفف كيننيدىڭ بالالارعا ارنالعان كىتابى قازاق تىلىندە جارىق كوردى

ا ق ش جازۋشىسى، سۋرەتشى جەفف كينني جازعان بۇل كىتاپتى قازاقستاندىق «Steppe مەن WORLD Publishing» باسپاسى شىعاردى. باسپا وكىلدەرىنىڭ ايتۋىنشا، كىتاپتى قازاق جانە اعىلشىن تىلدەرىندە وقۋعا بولادى، ياعني ءبىر باسىلىمدا ەكى تىلدەگى نۇسقا قاتار بەرىلىپ وتىر. «بالالار پلانشەت پەن تەلەفوننان ايرىلمايدى، كىتاپتان قاشادى. سونىڭ كەسىرىنەن بويىندا پسيحولوگيالىق تەرىس وزگەرىستەر بولىپ جاتادى. مۇنى قۇمارلىققا تەڭەر ەدىم. كوپ اتا- انا بالالارىنا كىتاپ وقۋدىڭ پايداسىن تۇسىندىرە الماي قينالادى.

«تەنتەك بالاقايدىڭ كۇندەلىگى» كوميكس- رومانى وسىندايدا جاقسى كومەكشى بولماق. بۇل ەڭبەكتى بالالار ءسۇيسىنىپ وقيدى جانە باسقا كىتاپتى وقۋعا دەگەن قۇلشىنىس پايدا بولادى. ال ءتۇپنۇسقا ءماتىننىڭ قاتار بەرىلۋى اعىلشىن ءتىلىن جاقسارتادى»، - دەيدى باسپا باسشىسى رايسا قادىر. سونىمەن قاتار، ول كىتاپ اۆتورى جەفف كينني قازاقستانعا كەلۋگە نيەتتى ەكەنىن ايتتى. «الداعى ۋاقىتتا اۆتوردى ارنايى شاقىرىپ، وقىرماندارعا ەرەكشە كەش سىيلايمىز دەپ ۇمىتتەنەمىن»، - دەيدى باسپا باسشىسى.

«تەنتەك بالاقايدىڭ كۇندەلىگىن» قازاق تىلىنە اۋدارعان - ناركەز بەرىكقازى. رەداكتورى - نازگۇل قوجابەك. كىتاپتىڭ باس كەيىپكەرى - قاراپايىم وقۋشى گرەگ حەففلي. ول باسىنان وتكەن الۋان ءتۇرلى قىزىق وقيعانى كۇندەلىك رەتىندە جازىپ جۇرەدى. گرەگتىڭ سۋرەتتەگەنىن وقىعان ءار بالا ءوزىن تانيدى، ساباق الادى.

«ءماتىنى جەڭىل، سۋرەتتەرى تارتىمدى، كەيىپكەرلەرىنەن بالالىق اڭعالدىق پەن تازالىق لەبى ەسىپ تۇرعان كىتاپتا ءار وقۋشىنىڭ باسىنان وتەتىن، اتا- انامەن، مۇعالىمدەرمەن، سىنىپتاستارمەن اراداعى قاتىناس، جاقسى مەن جاماننىڭ بايىبىنا بارۋ، باردى بار، جوقتى جوق دەپ ءتۇسىنۋ ەۆوليۋتسياسى سيپاتتالعان»، - دەيدى رايسا قادىر.

اۆتور: الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى