ە ۇ ۋ رەكتورى: «ساۋىتبەك ابدراحمانوۆتىڭ سىنىبى»، «جارىلقاپ بەيسەنباي ۇلىنىڭ سىنىبى» بولۋى كەرەك
بۇل تۋرالى ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ءمالىم ەتتى، دەپ حابارلايدى قازاقپارات ءتىلشىسى.
«قازىر الەم جۋرناليستىك بىلىمگە جاڭا كوزقاراستىڭ قاجەتتىگىن سەزىنە باستادى. بۇل نەدەن تۋىندايدى؟ ارينە، اقپارات تەحنولوگيالارىنىڭ دامۋى ءبىر باسقا، ادامداردىڭ قابىلداۋ ەرەكشەلىگى دە مۇلدەم وزگەردى. ءبىرىڭىز جاھاندانۋ، ءبىرىڭىز عالامدانۋ دەپ جۇرگەن ۇدەرىس ءومىردىڭ بار سالاسىنا جاڭالىقتار الىپ كەلىپ جاتىر. وسى وزگەرىستىڭ باسىندا اقپارات نەمەسە جۋرناليستيكا جۇرەرى ءسوزسىز. ءوز باسىم ۋنيۆەرسيتەت باسشىسى رەتىندە عانا ەمەس، ەلدەگى اقپارات جۇيەسىنە، اشىق ب ا ق الاڭدارىنا شىعىپ جۇرگەن ازامات رەتىندە بۇگىنگى جۋرناليستيكا مەن اقپاراتتىق بىلىمگە بەيجاي قاراي المايمىن»، - دەدى ە. سىدىقوۆ ونلاين-فورماتتا «قازاقستان رەسپۋبليكاسىنداعى جۋرناليستيكا دەڭگەيى» تاقىرىبىندا وتكەن تالقىلاۋ بارىسىندا.
وسى ورايدا ول ءتيىستى ۇسىنىستارىن ورتاعا سالدى.
«بىرىنشىدەن، قازىر قازاقستان ۋنيۆەرسيتەتتەرى اۆتونومياعا قاراي قادام باسىپ، وزىندىك ءبىلىم باعدارلامالارىن جاساۋعا مۇمكىندىك الدى. وسىنى پايدالانىپ، جۋرناليست دايارلاۋ ۇدەرىسىنە «اۆتورلىق ءبىلىم باعدارلامالارىن» ەنگىزۋىمىز كەرەك. تاياۋدا ءبىلىم جانە عىلىم مينيسترلىگى عىلىمي دارەجەدەن گورى شىعارماشىلىق تاجىريبەنى قاجەت ەتەتىن قولدانبالى ماماندىقتار قاتارىندا جۋرناليستيكانى اتادى. ءبىز وسى يدەيانى قولدايمىز. جۋرناليستيكا فاكۋلتەتىنە اتى-زاتى بار، تاجىريبەسى مول جۋرناليستەر تارتىلۋى كەرەك.
مىسالى، «ساۋىتبەك ابدراحمانوۆتىڭ سىنىبى»، «نۇرتورە ءجۇسىپتىڭ سىنىبى»، «جانبولات اۋپبايەۆتىڭ سىنىبى»، «جارىلقاپ بەيسەنباي ۇلىنىڭ سىنىبى»، «بيبىگۇل جەكسەمباي سىنىبى» دەسە، بۇعان بۇكىل ەل، بارشا جۋرناليستەر قاۋىمى، اسىرەسە تالاپكەرلەر ەلەڭ ەتە قالار ەدى. ارينە، تەوريالىق ءبىلىم پراكتيكا قاپتالىندا جۇرە بەرەدى»، - دەدى رەكتور.
اۆتور: رۋسلان عابباسوۆ
