ەلوردا اكىمىنىڭ كاسىپكەرلەرگە ۇندەۋى جولدادى
ەلوردا اكىمى التاي كولگىنوۆ ساۋدا جانە ويىن- ساۋىق ورتالىقتارىنىڭ، ساۋدا ۇيلەرىنىڭ، بازارلاردىڭ، فيتنەس- ورتالىقتاردىڭ باسشىلارىمەن نىساندارداعى قاتاڭ سانيتارلىق نورمالاردىڭ ساقتالۋى جانە كارانتين شارالارىن جەڭىلدەتۋ تۋرالى ونلاين كەڭەس وتكىزدى. قالانىڭ باس سانيتارلىق دارىگەرى ايگۇل شاعالتايەۆا قاتاڭ كارانتين ەنگىزىلگەن 5 - شىلدەدەن باستاپ كاسىپورىنداردان شامامەن 73 ميلليون تەڭگەگە سانيتارلىق نورمالاردى ساقتاماۋعا قاتىستى 800 فاكتى انىقتالعانىن اتاپ ءوتتى.
«ءبىرقاتار نىسان جۇمىسىن قايتا باستاعالى ەكىنشى اپتا بولدى. قازىر ءبىز ۆيرۋستىڭ ءالى جويىلماعانىن ءتۇسىنۋىمىز كەرەك. جرۆي ماۋسىمى الدىندا كوروناۆيرۋسقا قاتىستى احۋالدى قاداعالاۋ قاجەت. العاشقى كارانتين تاجىريبەسىنە سۇيەنىپ، قاتەلىك جىبەرمەۋ كەرەك. ول ءۇشىن نىسانداردا قاتاڭ سانيتارلىق- ەپيدەميولوگيالىق نورمالاردى ساقتاۋ قاجەت. ءبىرىنشى. ءتيىستى ورىندارعا ستاتسيونارلىق تەپلوۆيزور ورناتۋ ۇسىنىلادى، بۇل 30-40 كەلۋشىنىڭ دەنە قىزۋىن بىردەن ولشەۋگە، ادامدار اعىمىن ءتيىمدى باسقارۋعا مۇمكىندىك بەرەدى. سونىمەن قاتار بۇل قىزمەتكەرلەردىڭ وزدەرىن دە قورعايدى - ءار كەلگەن ادامعا جەكە ءمان بەرۋ جانە تەمپەراتۋرانى ولشەۋ قاجەت بولمايدى. پاندەميا باستالعالى بەرى ءبىز وسىنداي تەپلوۆيزوردى قالالىق ەمحانالارعا ورناتتىق. سونداي- اق جەلدەتۋ جۇيەسىنىڭ ۇزدىكسىز جۇمىس ىستەۋىن قامتاماسىز ەتۋ قاجەت، بارلىق جەردە الەۋمەتتىك قاشىقتىق بەلگىسى، سانيتايزەر بولۋى كەرەك، ماسكاسىز كىرۋگە تىيىم سالىنادى. ەكىنشى. سانيتارلىق نورمالاردىڭ بۇزىلۋىن انىقتاۋ بويىنشا رەيد تۇراقتى نەگىزدە جۇرگىزىلەدى. بۇل شارالار قاۋىپسىزدىكتى جاقسارتادى. رەيد بارىسىندا «ارتەم» جانە «Big شانحاي» بازارلارىندا ەسكەرتۋ جاسالدى. ولارعا ايىپپۇل سالىندى. سانيتارلىق نورمانى اكىمدىك، ينسپەكتورلار ءۇشىن ەمەس، كليەنتىڭىزدىڭ، ازاماتتاردىڭ قاۋىپسىزدىگى ءۇشىن ساقتاۋ كەرەك ەكەنىن ەستە ۇستاعان ءجون. ەندى ءبىز COVID-19 شارتتارىن قابىل الىپ، جاڭا جاعدايعا بەيىمدەلۋگە ءماجبۇرمىز. ەگەر ءار باسشى سانيتارلىق نورمالاردىڭ ساقتالۋىنا جاۋاپكەرشىلىكپەن قاراسا، وندا بۇكىل ۇجىم دا جاۋاپتىلىق تانىتادى. بۇل كەلۋشىلەر قاۋىپسىزدىگى دە قامتاماسىز ەتىلەدى دەگەن ءسوز. ءۇشىنشى. فيتنەس ورتالىقتارى وكىلدەرىنىڭ ۇسىنىسىن ەسكەرە وتىرىپ، ءبىز جۇمىس ۋاقىتىن 21: 00 گە دەيىن سوزدىق (بۇرىن 17:00 گە دەيىن بولعان) . بۇل باسشىلىقتىڭ كليەنتتەر اعىنىن ۋاقىتىلى سارالاي الۋى ءۇشىن جاسالادى. سونداي- اق ءبىر مەزگىلدە كەلۋشىلەر كوپ بولماۋى جانە تار ءدالىز قۇرىلماۋى ءۇشىن باسقا ساۋدا نىساندارىنداعى جۇمىس ۋاقىتىن سوزۋ جولدارىن قاراستىرامىز» ، - دەپ تۇيىندەدى ءسوزىن ەلوردا اكىمى التاي كولگىنوۆ.
ونلاين جينالىستا كاسىپكەرلەر كوتەرگەن ءبىرقاتار ماسەلەلەر شەشىمىن تاۋىپ، قالعانى جۇمىسقا الىندى.
