وقىعاندى قالاي تەز ەستە ساقتاۋعا بولادى؟
كىتاپ وقۋ - جادىنى جانە ويلاۋدى دامىتادى. ياعني، كوپ وقىعان ادام جادى مىقتى، تەز ويلاپ، تەز قورىتا الادى. كۇندەلىكتى ومىردە كىتاپ وقيتىن كىسى مەن وقىمايتىن كىسىنىڭ ايىرماشىلىعىن تەز بايقاۋعا بولادى. كىتاپ وقيتىن ادام اقىل، پاراسات، تانىم، ءبىلىم، ەلمەن قارىم- قاتىناس، ءتىل بايلىعى، سىپايىلىعى مەن مادەنيەتتىلىگى سەكىلدى ءبىرسىپىرا ىزگى قاسيەتتەرىمەن ەرەكشەلەنىپ تۇرادى.
ەگەر الىنعان اقپارات جادتا ساقتالسا جانە ءىس جۇزىندە كادەگە جاراسا ول ەكى ەسە پايدالى بولماق. كىتاپتى وقۋ ءبىر بولەك تە ونداعى مالىمەتتەردى، وقيعالاردى ەستە ساقتاۋ ءبىر بولەك. كوبىنە ءبىز وقىعان كىتاپتاعى وقيعالاردى، مالىمەتتەردى ۇمىتىپ قالىپ جاتامىز. بۇل - تابيعي پروتسەسس. وقىعان كىتابىڭىزدى ەستە ساقتاۋدىڭ بىرنەشە ءادىسى بار. سونىڭ بىرىنە توقتالايىق.
كىتاپ وقۋدىڭ العاشقى كۇنى
كىتاپ وقۋ كەزىندە ءار 20 مينۋت سايىن «مەن نە وقىپ جاتىرمىن؟ نە ءتۇسىندىم؟ « دەگەن سىندى سۇراقتارعا جاۋاپ بەرۋ كەرەك. ەڭ ماڭىزدى وقيعالاردى كوزگە ەلەستەتىپ، ۇمىتىپ قالامىن دەگەن جەرلەرىن سىزىپ قويىڭىز.
نەلىكتەن 20 مينۋت؟
نەمىس پسيحولوگى گەرمان ەببينگاۋز ادام جادىندا دەرەكتەردى ساقتاۋ پروتسەسىن زەرتتەگەن. زەرتتەۋلەرگە سايكەس، ادام العاشقى 20 مينۋتتا العان اقپاراتتىڭ 40 پايىزىن، ال 1 ساعات ىشىندە 60 پايىزىن ۇمىتىپ قالادى ەكەن. ال ءبىر كۇننەن كەيىن دەرەكتەردىڭ تەك 33-35 پايىزى عانا ساقتالىپ قالادى.
ەگەر الىنعان مالىمەتتى ءار 20 مينۋتتا وڭدەپ وتىرماساق، بۇل اقپاراتتار جادتا ساقتالماي ءوشىپ كەتەدى.
زەرتتەۋلەر جادتا اقپاراتتى جاقسى ساقتاۋ ءۇشىن قايتالاپ وقۋدان گورى ونى بىرەۋگە (نەمەسە وزىڭىزگە) بايانداپ بەرگەن ءتيىمدى ەكەنىن كورسەتكەن. سەبەبى سويلەۋ كەزىندە مي اقپاراتتى باسقا دەرەكتەرمەن بايلانىستىرۋعا تىرىسادى. بۇل ءادىس ميدىڭ مالىمەتتى قابىلداپ قانا قويماي، قايتا وڭدەۋگە سەپتىگىن تيگىزەدى.
وقۋدىڭ ءبىرىنشى كۇنىنىڭ سوڭىندا وقىعان اقپاراتىڭىزدىڭ ماڭىزدى تۇستارىن جازىپ الىڭىز. جازۋ ءادىسىڭىز ءجاي جازۋ ەمەس، ينتەللەكتۋال كارتا تۇرىندە بولسا، ىڭعايلى جانە قىزىق بولادى.
سونداي- اق، تۇندە ۇيىقتاماس بۇرىن جادتا ساقتالۋى كەرەك اقپاراتتى قايتالاۋ پايدالى. مي ۇيقىعا دەيىن الىنعان اقپاراتتى جاقسى ەستە ساقتايدى.
وقۋدىڭ كەلەسى كۇنى
مۇنى سەريالداردا قولدانىلاتىن الگوريتم كومەگىمەن جاساۋعا بولادى. ادەتتە سەريالدىڭ كەلەسى ءبولىمى باستالماي تۇرىپ، الدىڭعىسىنداعى وقيعالار ۇزىك- ۇزىك كورسەتىلەدى. سول سياقتى كىتاپتى جالعاستىرىپ وقىماس بۇرىن، الدىڭعى وقىعاندارىڭىزدى ءبىر قايتالاپ العان ءجون.
كىتاپتى وقىپ بولعان سوڭ
الىنعان اقپاراتتى مۇمكىندىگىنشە تەزىرەك تاجىريبەدە قولدانۋعا كىرىسۋ كەرەك. ولاردى ءىس جۇزىندە قولدانۋ كەرەك بولماي، ءبىراق وقىعانىڭىزدى ەستە ساقتاعىڭىز كەلسە، ءجيى- ءجيى كىتاپتى قايتا پاراقتاپ تۇرعان ءتيىمدى.
massaget.kz
