قازاقستانداعى ىشكى تۋريزمگە كوروناۆيرۋس قالاي اسەر ەتتى
كارانتين شارالارى كوپتەگەن سالانىڭ كۇندەلىكتى تىرشىلىگىنە ايتارلىقتاي اسەر ەتتى. سونىڭ ءبىرى - تۋريزم سالاسى.
وسى ورايدا قازاقستاننىڭ ىشكى تۋريزمىنە كارانتين قالاي اسەر ەتتى، ونىڭ تۇراقتى ءوسۋىن قامتاماسىز ەتۋ جولىندا قانداي شارالار جۇزەگە اسىرىلىپ جاتىر؟ وسى جانە وزگە دە سۇراقتارعا جاۋاپ الۋ ماقساتىندا قازاقپارات ءتىلشىسى «Kazakh Tourism» ۇلتتىق كومپانياسىنا ساۋال جولداعان بولاتىن.
«الەمدەگى جانە ەلدەگى پاندەميا سالدارىنان قازاقستاندىقتاردىڭ بيىلعى جىلعا جوسپارلاعان دەمالىس ماۋسىمى ايتۋلى وزگەرىستەرگە ۇشىراعانى بەلگىلى. وسى ورايدا وتانداستارىمىز ىشكى تۋريستىك باعىتتاردى تاڭداۋدا، الايدا ەلدەگى كارانتينگە بايلانىستى تۋريستىك سۇرانىس تولىعىمەن جۇزەگە اسىرىلماي وتىر. سول سەبەپتى ىشكى تۋريزم كورسەتكىشىنىڭ ءوسۋى ەكىتالاي. بولجام بويىنشا، بيىل ىشكى تۋريستىك اعىن وتكەن جىلمەن سالىستىرعاندا % 70-80- عا ازايادى. ال جالپى العاندا كەيىنگى جىلدارى ىشكى تۋريزم كورسەتكىشى قارقىندى دامىپ كەلگەنىن ەسكەرگەن ءجون. مىسالى، 2019 -جىلى 6,6 ميلليون ىشكى تۋريست بولدى، ول دەگەنىمىز 2018 -جىلمەن سالىستىرعاندا 13 پايىزعا ارتىق»، - دەلىنگەن اقپاراتتا.
سونداي- اق، رەسمي مالىمەتتە وتاندىق تۋريستەر دەمالۋ ءۇشىن كوبىنەسە ەلىمىزدىڭ قاي ءوڭىرىن تاڭدايتىنى ايتىلعان.
«وسى جازعى ماۋسىمدا وتاندىق تۋريستەردىڭ نازارىندا ماڭعىستاۋ، بۋراباي، الاكول كۋرورتتىق ايماقتارى بولدى. سونىمەن قاتار، جاڭادان اشىلعان تۋريستىك ورىندار جوعارى سۇرانىسقا يە. ونىڭ ىشىندە، ەلوردا ىرگەسىندەگى كوبەيتۇز كولى جانە وعان تەڭدەس پاۆلودار وبلىسىنداعى كورياكوۆكا كولى. ودان بولەك، اقمولا وبلىسىنداعى بەستوبە شاتقالى مەن سىلەتى سۋ قويماسى جانە الماتى وبلىسىنداعى تەكەس سارقىراماسى»، - دەپ حابارلايدى ۆەدومستۆودان.
ودان بولەك، ۇلتتىق كومپانيا كارانتين رەجىمى ىشكى تۋريزمگە قانشا شىعىن اكەلگەنىنە قاتىستى مالىمەتتەرمەن ءبولىستى.
«ەڭ الدىمەن، كارانتين تالاپتارى ترەنينگ، كونفەرەنسيالار، بانكەتتەردىڭ وتۋىنە، سونداي- اق قوناقۇيلەردەگى SPA مەن باسسەيندەرگە اسەر ەتتى. مۇنداي قىزمەتتەرگە سۇرانىس جوعارى بولدى. بۇل قىزمەتتەر كۋرورتتار مەن قوناقۇيلەردىڭ، اسىرەسە، ەلوردا جانە الماتى قالاسىنان تۇسەتىن كىرىستەردىڭ % 30- ىن قۇرايدى دەپ ايتۋعا بولادى. ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتىنشە، 2019 -جىلى تۋريستىك كومپانيالار مەن كۋرورتتىق ايماقتار ۇسىناتىن قىزمەتتەر كولەمى شامامەن 300 ميلليارد تەڭگەنى (شامامەن 730 ميلليون ا ق ش دوللار) قۇرادى. وسى مالىمەتتەرگە سۇيەنە وتىرىپ، سونىمەن قاتار قىزمەتتەردىڭ باسىم بولىگى جازعى ماۋسىمدا كورسەتىلەتىنىن ەسكەرە وتىرىپ، تولىق ىركىلىس مەرزىمىندە قازاقستاننىڭ تۋريستىك يندۋسترياسى كۇنىنە شامامەن 1 ميلليارد تەڭگەنى جوعالتادى دەپ بولجاۋعا بولادى»، - دەلىنگەن ساۋال جاۋابىندا.
ۇلتتىق كومپانيانىڭ سوڭعى ۋاقىتتا ءجيى ورىن الىپ جاتقان تۋريستەردىڭ دەمالىس ورىندارىن لاستاۋعا قاتىستى ۇستانىمىن بىلدىك.
«تۋريزمدە، كەز- كەلگەن بيزنەستەگىدەي، نارىقتىق مەحانيزمدەر جۇمىس ىستەيدى. سۇرانىس بولسا، الەۋمەتتىك جەلىلەردە بەلسەندى جارناما جۇرگىزىلسە، وسىنداي بىرەگەي ورىندارعا تۋريستىك اعىن وسە باستايدى. الايدا، بۇل باقىلاۋسىز اعىن تابيعي نىساننىڭ ەكوجۇيەسىنە كەرى اسەرىن تيگىزەدى. سول سەبەپتى ەلىمىزدە بىرەگەي نىساندار قورعاۋعا الىنادى. قازاقستان اۋماعىندا تۋريستەردى قىزىقتىراتىن ورىن كوپ، الايدا مەملەكەتتىك ورگانداردا بارلىق تەرريتوريالاردى باقىلاۋعا جەتكىلىكتى رەسۋرسى جوق. سوندىقتان ءبىز تۋريستىك رەسۋرستاردى ۇقىپتى پايدالانۋعا شاقىرامىز جانە جاقىن ارادا وسى ماسەلە بويىنشا الەۋمەتتىك جەلىلەردە بەلسەندى جۇمىستى باستايمىز»، - دەلىنگەن مالىمەتتە.
اۆتور: ءالي يبرايەۆ
