فۋتبول: قازاقستاندىق ويىنشى رەسەي چەمپيوناتىندا ەرەكشە كوزگە ءتۇستى

«روستوۆ» ساپىندا قازاقستان ۇلتتىق قۇراماسىنىڭ مۇشەسى، جارتىلاي قورعاۋشى باكتيەر زاينۋتدينوۆ الاڭعا شىعىپ، ءوز كومانداسىنىڭ جەڭىسكە جەتۋىنە سۇبەلى ۇلەسىن قوستى. وسىعان دەيىن ءۇش ويىندا نەبارى ءۇش ۇپاي جيناعان، بەلگىلى رەسەيلىك فۋتبولشى ءارى مامان ۆالەري كارپين جاتتىقتىراتىن «روستوۆتىڭ» جاڭا ماۋسىمداعى قارقىنى ونشا ەمەس-ءتى. ال ۋفالىقتار 4 ۇپايمەن ءسال الدا تۇرعان. ماتچتىڭ 39-مينۋتىندا ورەسكەل ءتارتىپ بۇزعان «ۋفانىڭ» جارتىلاي قورعاۋشىسى ۆياچەسلاۆ كروتوۆ الاڭنان قۋىلىپ، كومانداسىن قيىن جاعدايدا قالدىردى. كوپ ۇزاماي ب. زاينۋتدينوۆ قاقپا بۇرىشىن ءدال كوزدەگەنىمەن، ۋفالىق قورعاۋشى الەكسەي نيكيتين كومانداسىن گولدان امان الىپ قالدى.

بۇدان كەيىن قاقپاشى الەكساندر بەلەنوۆ وزبەكستاندىق ەلدور شومۋرودوۆتىڭ گول سوعۋىنا مۇمكىندىك بەرگەن جوق. ماتچ تاعدىرى ەكىنشى تايمدا شەشىلدى. 79-مينۋتتا سول قاپتالدان سۋىرىلىپ شىققان ب. زاينۋتدينوۆتىڭ قاقپاعا قاراي بەرگەن دوبىن كومانداعا جاڭا ماۋسىمدا كەلگەن جاپونيالىق كەنتو حاشيموتو باسپەن ءدال ءتۇسىردى.

وسىلايشا باكتيەر ناتيجەلى پاس اۆتورى اتاندى. روستوۆتىقتار 1:0 ەسەبىمەن جەڭىسكە جەتىپ، تۋرنير كەستەسىندە 8-ورىنعا كوتەرىلدى.

26- تامىزدا وتەتىن بەسىنشى تۋردا «روستوۆ» ءوز الاڭىندا «ۋرال» (ەكاتەرينبۋرگ) كومانداسىن قابىلدايدى.

ەسكە سالا كەتەيىك، بۇدان بۇرىن قازاقستان قۇراماسى فۋتبولشىسىنىڭ ماسكەۋدىڭ تسسكاسىنا اۋىسۋى مۇمكىن ەكەندىگىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى