ەلىمىزدە ۇن باعاسى ءوسۋى مۇمكىن
جازدا تاعى 15 تەڭگە قوسىلعان. وسى تەرىس ديناميكا ءازىر تەجەلمەيتىن سەكىلدى. ايتالىق، اقمولالىق ديقاندار بيىل استىقتىڭ از شىققانىن العا تارتىپ، باعا تاعى كوتەرىلە مە دەگەن كۇدىگىن ايتىپ وتىر. بۇل ايماقتا گەكتارىنان نەبارى 10-11 تسەنتنەر ءونىم الىنادى دەگەن بولجام بار. اتباسار اۋدانىنداعى بۇل شارۋاشىلىق بيىل 16 مىڭ گەكتار جەرگە بيداي سەۋىپتى. استىق، قازىر ءپىسىپ، دايىن تۇر. بۇيىرتسا، ەگىنگە جاقىندا وراق تۇسەدى. ءتيىمدى تەحنولوگيالاردى قولدانۋدىڭ ارقاسىندا سەرىكتەستىك وسى جىلى اۋا رايىنىڭ قولايسىز بولۋىنا قاراماستان، وتە ساپالى ءونىم الۋدان ءۇمىتتى.
مۇرات ءسادۋاقاسوۆ، اگرونوم:
- بيىل ساپالى ءبيداي الامىز دەپ جوسپارلاپ وتىرمىز. سەبەبى، ءونىمنىڭ قامىرلىعى وتە جاقسى. ال، بۇل، ۇن وندىرۋگە تاپتىرمايتىن شيكىزات. باعاسى دا ءسال قىمباتتاۋ بولادى.
ءبيدايدىڭ قىمباتتاعانى ءناسىبىن جەردەن تاۋىپ وتىرعان شارۋالار ءۇشىن جاقسى، ارينە. الايدا ودان وندىرىلەتىن ۇن مەن ناننىڭ تۇتىنۋشىسى - قاراپايىم حالىق ءۇشىن وڭاي ەمەس. ماسەلەن، ۇلتتىق ەكونوميكا مينيسترلىگىنىڭ جىل باسىندا بەرگەن ستاتيستيكاسىنا سايكەس، بيىل جوعارى سۇرىپتى ۇن باعاسى 24 پروتسەنتكە كوتەرىلىپ، 163 تەڭگەدەن 200 تەڭگەگە ءبىر- اق شىققان ەدى. ال جازدا تاعى 15 تەڭگە قوسىلدى.
يۆان بۋتاكوۆ، ديىرمەن كەشەنى ديرەكتورىنىڭ ورىنباسارى:
- ءسىز تۇسىنەسىز بە، وندىرىستەگى شىعىندار وتە كوپ. كوممۋنالدىق تولەمدەر، سالىق، جۇمىسشىلاردىڭ جالاقىسى، وسىنىڭ ءبارى ۇن باعاسىنا تىكەلەي اسەر ەتەدى. ودان قالدى ءبيدايدىڭ كولەمى مەن ساپاسى دا ۇننىڭ وزىندىك قۇنىن قالىپتاستىرۋعا سەپتىگىن تيگىزەدى. ال بيىل ناقتى قانشاعا قىمباتتايتىنى ەگىن تولىق جينالىپ بولعان سوڭ بەلگىلى بولادى.
ۇننىڭ باعاسى كوتەرىلسە، نان دا قىمباتتايدى. قازىردىڭ وزىندە ەل بويىنشا اس اتاسىنىڭ 100 تەڭگەدەن كەمى جوق. ال ۇن مەن ۇن ونىمدەرىنىڭ نارىعىنا قاتىستى جاڭا وزگەرىستەر بيىلعى ەگىن وراعى اياقتالىپ، استىقتىڭ ءبارى قامباعا قۇيىلعان سوڭ بەلگىلى بولماق. سەبەبى ونىڭ ءوزى وسى جىلى وڭاي بولمايتىن ءتۇرى بار. ويتكەنى اگرارلى ايماقتاردا كۇنارا جاۋىن. ءبىر عانا اقمولا وبلىسى ديقاندارىنىڭ الدىندا 4 جارىم ميلليون گەكتارعا جۋىق جەردىڭ ءدانىن جيناۋ مىندەتى تۇر. ال شارۋالار بولسا، جيىم- تەرىمگە ەندى عانا كىرىستى.
www.24.kz
