ولجاس سۇلەيمەنوۆتىڭ نەمەرەسى قازا بولعان جول اپاتىنا كىنالى ازامات بوستاندىققا شىقتى
بۇل تۋرالى نۇر- سۇلتان قالالىق سوتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«وسى جىلدىڭ 23 - ماۋسىمىندا بايقوڭىر اۋداندىق №2 سوتىنىڭ قاۋلىسىمەن سوتتالعان مۇحيتوۆانىڭ جازاسىنىڭ قالعان بولىگىن اۋىستىرۋ تۋرالى ءوتىنىشى قاناعاتتاندىرىلعان جوق. نۇر- سۇلتان قالالىق سوتىنىڭ اپپەلياتسيالىق ساتىسى بۇل شەشىمدى جويىپ، باس بوستاندىعىنان ايىرۋدىڭ وتەلمەگەن بولىگى ايىپپۇلعا اۋىستىرىلدى. قىلمىستىق كودەكستىڭ 73-بابىنا سايكەس، قىلمىسپەن كەلتىرىلگەن زالالدى تولىق وتەگەن نە جازانى وتەۋدىڭ بەلگىلەنگەن ءتارتىبىن قاسكويلىكپەن بۇزباعان جاعدايدا، سوت جازانىڭ قالعان وتەلمەگەن بولىگىن نەعۇرلىم جەڭىل جازا تۇرىمەن اۋىستىرۋى مۇمكىن. زاڭنىڭ بۇل تالابىن مۇحيتوۆا ورىندادى»، - دەلىنگەن تاراتىلعان اقپاراتتا.
سوتتىڭ مالىمەتىنشە، بۇگىنگى كۇنگە دەيىن ول جازانىڭ باسىم بولىگىن وتەگەن. وتەلمەگەن 4 اي 27 كۇن عانا قالعان. ول جازاسىن وتەۋ بارىسىندا ءوزىن ءتارتىپتى ۇستاپ، مەكەمەنىڭ قوعامدىق ومىرىنە بەلسەندى قاتىسقانى جانە ۇلگىلى ءتارتىبى ءۇشىن 3 رەت ىنتالاندىرىلعان. تۇزەۋ مەكەمەسى دە وعان وڭ سيپاتتاما بەرگەن.
«نۇر- سۇلتان قالاسى ەسىل اۋداندىق سوتىنىڭ شەشىمىمەن ءوندىرىلىپ الىناتىن مورالدىك وتەماقىنى م. مۇحيتوۆا تولىقتاي تولەدى. پروكۋرور مەن مەكەمە وكىلى دە سوتتالۋشىنىڭ ءوتىنىش حاتىن قولداپ، جازانى نەعۇرلىم جەڭىل تۇرىمەن اۋىستىرۋدى ءوتىندى. اتالعانداردىڭ نەگىزىندە اپپەلياتسيالىق ساتى مۇحيتوۆانىڭ باس بوستاندىعىنان ايىر تۇرىندەگى جازاسىن ايىپپۇلعا اۋىستىردى»، - دەلىنگەن تاراتىلعان اقپاراتتا.
ەسكە سالايىق، 2018 -جىلدىڭ ماۋسىم ايىندا استانادا جول اپاتىنان اقىن ولجاس سۇلەيمەنوۆتىڭ 26 جاستاعى جيەنى ەسكەندىر سۇلەيمەنوۆ مەرت بولدى. ەسكەندىر تىزگىندەگەن موتوتسيكل قيىلىسقا شىققان كولىككە سوعىلدى. ارادا كوپ ۋاقىت وتپەي استانا قالالىق ىشكى ىستەر دەپارتامەنتى اپاتقا سەبەپكەر بولۋى مۇمكىن «Hyundai» اۆتوكولىگىنىڭ يەسى، 29 جاستاعى ماليكا مۇحيتوۆاعا قاتىستى تەرگەۋ امالدارى ءجۇرىپ جاتقانىن حابارلادى. كەيىننەن م. مۇحيتوۆا قىزىلوردا وبلىستىق ءى ءى د (پوليتسيا دەپارتامەنتىنىڭ) باستىعىنىڭ قىزى ەكەنى انىقتالدى. ول 2 جىلعا باس بوستاندىعىنان ايرىلعان بولاتىن.
اۆتور: مارلان جيەمباي
