قوستانايدا «جومارت جۇرەك» جەڭىمپازدارى انىقتالدى
«جومارت جۇرەك» سىيلىعى - «رۋحاني جاڭعىرۋ» باعدارلاماسىنىڭ «اتامەكەن» كىشى باعدارلاماسى شەڭبەرىندە ۇيىمداستىرىلىپ وتىرعان بىرەگەي جوبا. اتالعان سىيلىق تۋعان ولكەنىڭ دامۋىنا ەلەۋلى ۇلەس قوسقان مەتسەناتتارعا، بەلسەندى تۇلعالارعا، بيزنەس- قۇرىلىم وكىلدەرىنە، ەرىكتىلەر مەن ءتۇرلى ۇيىمدارعا تابىستالادى. سونىمەن، قوستاناي قالاسىنداعى ءىرى الەۋمەتتىك جوبالاردى ىسكە اسىرعانى جانە قايتارىمسىز كومەك كورسەتكەنى ءۇشىن «جىل مەتسەناتى» نوميناتسياسىندا تالعات ەشانوۆ ماراپاتتالدى. ال بەلسەندى ازاماتتىق ۇستانىمى جانە قايىرىمدىلىق قىزمەتتى جۇزەگە اسىرعانى ءۇشىن «جىل تۇلعاسى» نوميناتسياسىندا ريمما بەكتۇرعانوۆا جەڭىمپاز اتاندى.
«ۇزدىك ۇيىم» نوميناتسياسىنا «فورتۋنامەد» ج ش س ديرەكتورى الەكساندر ماتسكيەۆيچ وزىق شىقسا، «ەرەن ەرىكتىلىك» اتالىمىنىڭ جۇلدەسىن باۋىرجان ءجۇسىپوۆ يەلەندى. قازىلار القاسى «تۋعان ولكە» نوميناتسياسىنا ەلەنا اندرەيەۆانى لايىق دەپ تانىدى. بارلىق ماراپات يەلەرىنە العىس حاتتار جانە ستاتۋەتكالار تابىس ەتىلدى.
«ەلباسىمىز ءوزىنىڭ باعدارلامالىق ماقالاسىنداعى «تۋعان جەر» جوباسىندا ىسكەر ازاماتتاردى تۋعان ولكەنى تۇلەتىپ، اۋىل تۇرمىسىن جاقسارتۋعا اتسالىسۋعا شاقىرعان بولاتىن. كەز كەلگەن ادامنىڭ تۋعان جەرىنە دەگەن پاتريوتتىق سەزىمىن وياتقان قۇندى جوبانىڭ ناتيجەسىن بۇگىندە ەل كورىپ وتىر. وسى جوبا اياسىندا تۋىپ- وسكەن اۋىلىندا ءىرى الەۋمەتتىك جوبالاردى ىسكە اسىرىپ، كوپبالالى وتباسىلار مەن اتا- انانىڭ قاراۋىنسىز قالعان جەتىم بالالارعا كومەك قولىن سوزىپ، قايىرىمدىلىق جاساپ جۇرگەن جاندار از ەمەس. بۇگىنگى ماراپات يەلەرى دە وبلىسقا ەڭبەگى سىڭگەن تۇلعالار» ، - دەپ اتاپ ءوتتى قوستاناي قالاسى اكىمدىگىنىڭ ىشكى ساياسات بولىمىندەگىلەر.
