سولتۇستىك قازاقستانداعى زاۋىتتا كومپيۋتەرلەر قۇراستىرىلىپ جاتىر
س ق و اكىمى باسپا ءسوز قىزمەتىنىڭ مالىمەتىنشە، بۇگىن ءوڭىر باسشىسى قۇمار اقساقالوۆ پەتروپاۆلداعى كيروۆ اتىنداعى زاۋىتتا بولىپ، كومپيۋتەرلىك تەحنيكانى قۇراستىرۋ پروتسەسىنىڭ بارىسىن قاداعالادى. كاسىپورىن قىركۇيەك ايىنا دەيىن 5 مىڭ كومپيۋتەردى قۇراستىرماق. زاۋىت كومپيۋتەرلىك تەحنيكانى بىرگە شىعارۋعا «Great Wall» قىتايلىق كاسىپورىنمەن كەلىسىمگە وتىردى. «Microsoft» كورپوراتسياسىمەن دە تىكەلەي كەلىسىم جاسالدى.
«بۇل جوبانىڭ بىزدە بولعانى وتە ماڭىزدى. ءبىرىنشى كەزەڭدە كومپيۋتەرلەردى قۇراستىرامىز. ەكىنشى كەزەڭدە پلاتالار شىعارىلا باستايدى. وعان ارنايى الىنعان جاڭا قوندىرعى بار. ءبىز مامانداردى قىتايعا جىبەرىپ، وقىتامىز. كومپيۋتەرلەرگە سۇرانىس جوعارى. ءبىز ءقازىر مەكتەپتەرگە زاۋىتتان شىققان 2 مىڭ كومپيۋتەردى الىپ جاتىرمىز. كورشى وبلىستار دا قىزىعۋشىلىق تانىتىپ جاتىر. وسى جوبانىڭ ارقاسىندا جاڭا جۇمىس ورىندارى اشىلىپ جاتىر. تەك ءبىرىنشى پارتيانىڭ ەسەبىنەن زاۋىت بيۋدجەتكە 120 ميلليون ت گ سالىق تولەدى»، - دەدى قۇمار اقساقالوۆ.
جالپى كاسىپورىن 1-قىركۇيەككە دەيىن «زيك» ماركالى 5 مىڭ كومپيۋتەردى قۇراستىرىپ شىعارۋى ءتيىس. ال جاڭا جىلعا دەيىن تاعى 50 مىڭ كومپيۋتەر مەن 50 مىڭ نوۋتبۋكتى ساۋداعا شىعارماق.
