باسشى ءوز قىزمەتكەرلەرىنىڭ زاڭسىز ارەكەتتەرىن جاسىرماۋى كەرەك - توقايەۆ

«سىبايلاس جەمقورلىق جونىندە جۇيەلى تۇردە ەسكەرتىپ وتىرۋعا ەرەكشە ءمان بەرگەن ءجون. وسىعان وراي، ءتۇرلى سالاداعى جەمقورلىققا جول اشاتىن جاعدايلارعا ساپالى تالداۋ جاساۋ كەرەك. زاڭ بارلىق مەملەكەتتىك ورگاندارعا تۇيتكىلدى تۇستاردى ءوز بەتىنشە انىقتاپ، جويۋعا مىندەتتەيدى. الايدا، بۇل جۇمىس ءجۇرىپ جاتقان جوق. مۇنداي ارەكەتسىزدىك جاقسىلىققا اپارمايدى. دەر كەزىندە الدىن الۋ جانە ەسكەرتۋ جۇمىسى جۇرگىزىلمەسە، جەمقورلىق دەگەن كەسەل كوپتەگەن ادامنىڭ جارقىن كەلەشەگىنە بالتا شابۋى ابدەن مۇمكىن»، - دەدى مەملەكەت باسشىسى.

ق ر پرەزيدەنتىنىڭ اتاپ وتۋىنشە، جەمقورلىقپەن كۇرەستەگى ارەكەتسىزدىك ازاماتتار تاراپىنان نارازىلىق كوڭىل- كۇيى مەن قۇقىقتىق نيگيليزمنىڭ ورشۋىنە الىپ كەلەدى. جەمقورلىق دەڭگەيى بارىنشا جوعارى وڭىرلەردە ادەتتە جاپپاي سيپاتتاعى قىلمىستىق كورىنىستەردىڭ دە ورىن الۋ توسىن سايكەستىك بولۋى مۇمكىن ەمەس. ال بۇگىنگى باعالاۋلار بەلگىلى ءبىر مينيسترلىكتەگى انىقتالعان پاراقورلىق فاكتىلەرى سانىنا عانا نەگىزدەلىپ وتىر. باعالاۋ الدىن الۋ بويىنشا قابىلدانعان شارالار، جەمقورلىق تاۋەكەلدەرىن تومەندەتۋ جانە مەملەكەتتىك قىزمەتتەردى الۋ بارىسىنداعى كەدەرگىلەردى جويۋ نەگىزىندە قالىپتاسۋى ءتيىس.

«باسشى ءوز قىزمەتكەرلەرىنىڭ زاڭ بۇزۋشىلىعىن جاسىرماۋى كەرەك. سوندىقتان، ونى تەك جازاعا تارتۋدان بولەك، ىنتالاندىرۋ دا ماڭىزدى. بۇل الدىن الا جۇيەلى شارالار قابىلداۋعا ايتارلىقتاي سەپتىگىن تيگىزەدى. ءاربىر اكىم جانە مينيستر جۇمسالعان قاراجاتقا عانا ەمەس، ونى دۇرىس جوسپارلاۋعا دا جاۋاپتى بولۋعا ءتيىس. ناق وسى تۇستا سىبايلاس جەمقورلىققا بارۋ قاتەرى كوپ بولۋى مۇمكىن. سوندىقتان، ءار باسشىعا جەكە جاۋاپكەرشىلىك جۇكتەلەدى. باس پروكۋراتۋراعا وسىنداي باعالاۋ جۇيەسىن ازىرلەۋدى تاپسىرامىن»، - دەدى قاسىم- جومارت توقايەۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى