بالىق شارۋاشىلىعىن دامىتۋعا مەملەكەتتىك قولداۋ شارالارى جەتكىلىكسىز - مينيستر
«جۇرگىزىلگەن تالداۋعا سايكەس، 2019 -جىلدىڭ قورىتىندىسى بويىنشا بالىق ازىعىنا 407 ميلليون تەڭگە سۋبسيديا ءبولىندى. سۋبسيديالاۋدىڭ جالپى كولەمىنىڭ % 81,5 نەمەسە 332 ميلليون تەڭگەسى تۇركىستان وبلىسىنا تيەسىلى. بۇل ايماق بالىق ءوندىرۋ بويىنشا كوشباسشى بولىپ تۇر. باسقاشا ايتقاندا، بۇل بالىق سالاسىن دامىتۋعا بولىنەتىن سۋبسيديالاۋ كولەمىنە تىكەلەي تاۋەلدى ەكەنىن بىلدىرەدى»، - دەدى ماعزۇم مىرزاعاليەۆ.
مينيستر بالىق ءوسىرۋدى سۋبسيديالاۋ ءۇشىن وڭىرلەرگە ترانسفەرت كولەمىن ۇلعايتۋدى سۇرادى.
«ءبىز قولدانىستاعى مەملەكەتتىك قولداۋ شارالارىن قوسىمشا سۋبسيديالاۋمەن كەڭەيتۋ ماسەلەسىن پىسىقتادىق. ءبىرىنشى، سۋبسيديالاۋدىڭ جاڭا تۇرلەرىن ەنگىزۋ ماسەلەسى. ەكىنشى، تور ىشىندە بالىق ءوسىرۋ شارۋاشىلىعىن، سۋمەن قامتاماسىز ەتۋدىڭ تۇيىق تسيكلى بار بالىق ءوسىرۋ شارۋاشىلىعىن، سونداي- اق قايتا وڭدەۋ جونىندەگى كەشەندەردى قۇرۋعا جانە كەڭەيتۋگە جۇمسالعان شىعىنداردى وتەۋ ماسەلەسى. اۋىل شارۋاشىلىعى مينيسترلىگى مەن وبلىس اكىمدىكتەرى بۇل ۇسىنىستاردى قولدادى»، - دەيدى ول.
وسى ماسەلەلەر ءبىر جولعا قويىلسا، وسىرىلگەن بالىق كولەمىن 600 مىڭ تونناعا دەيىن ارتتىرۋعا، ەكسپورت كولەمىن 10 ەسەگە ۇلعايتۋعا، شامامەن 500 ميلليارد تەڭگە كولەمىندە جەكە ينۆەستيتسيالار تارتۋعا بالىق شارۋاشىلىعىنىڭ الەۋەتى جەتكىلىكتى.
«بۇدان باسقا، شامامەن 100 مىڭ قوسىمشا جۇمىس ورنىن قۇرۋعا جانە كوبىنە اۋىلدىق جەرلەردە حالىق تابىسىن ارتتىرۋعا ىقپال ەتەدى»، - دەيدى مينيستر.
ەسكە سالا كەتسەك، ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ بۇگىن ۇكىمەت وتىرىسىندا بالىق شارۋاشىلىعىن دامىتۋعا كەدەرگى 3 پروبلەمانى اتادى. ولاردىڭ العاشقىسىنىڭ شەشىمى رەتىندە سۋ قويمالارىن بالىق اۋلاۋدان بالىق وسىرۋگە بەيىمدەۋدى ۇسىندى. ەكىنشى تۇيىتكىلدى شەشۋ ءۇشىن «اكۆاوسىرۋ تۋرالى» زاڭ قابىلداۋ قاجەتتىگىن ايتتى.
مينيستر اتاپ وتكەن ءۇشىنشى ماسەلە - سالاعا مەملەكەتتىك قولداۋدىڭ جەتكىلىكسىزدىگى.
