بۇگىن ەلىمىزدە - سپورت كۇنى
سپورت سالاسى قازاقستاندا كەڭ قولداۋعا يە. ەلدە سپورتتىڭ دامۋىنا بۇقارالىق سپورت قوزعالىسىن كەڭەيتۋگە، سپورتتاعى جەتىستىكتەردى ىنتالاندىرۋعا باعىتتالعان ساياسات ىقپال ەتۋدە. قازاقستاندىق سپورتشىلار سوڭعى ونجىلدىقتاردا حالىقارالىق جارىستاردا، وليمپيادا ويىندارىندا ۇزدىك ناتيجەلەردى كورسەتىپ كەلەدى.
مەملەكەتتىڭ ءوزى بەدەلدى حالىقارالىق جارىستاردى وتكىزەتىن ورىنعا اينالۋدا. بۇل قازاقستاندا سپورت مادەنيەتىنىڭ جوعارى دەڭگەيدە دامۋىنىڭ الەمدىك مويىندالۋىن كورسەتەدى. بيىل ەلىمىزدە دەنە شىنىقتىرۋ جانە بۇقارالىق سپورتتى دامىتۋ جونىندەگى 2020-2025-جىلعا ارنالعان كەشەندى جوسپارى ازىرلەندى.
بۇل جوسپاردا مۇددەلى مەملەكەتتىك ورگانداردىڭ، جەرگىلىكتى اتقارۋشى ورگانداردىڭ ۇسىنىستارى تولىق ەسكەرىلىپ، ق ر پرەمەر-مينيسترىمەن بەكىتىلدى. كەشەندى جوسپار 34 تارماق پەن 5 نەگىزگى باعىتتان تۇرادى: نورماتيۆتىك- قۇقىقتىق قامتاماسىز ەتۋ، مەكتەپ جانە ستۋدەنتتىك سپورت، سپورت جەلىلەرىن كەڭەيتۋ، سالاۋاتتى ءومىر سالتىن ناسيحاتتاۋ جانە كەڭىنەن تاراتۋ، سپورتتىق-بۇقارالىق ءىس-شارالارى.
بۇقارالىق سپورتتى دامىتۋ، سونداي-اق دەنە شىنىقتىرۋمەن جانە سپورتپەن شۇعىلداناتىنداردىڭ سانىن ارتتىرۋ ماقساتىندا كەشەندى جوسپاردا نەگىزگى باعىتتار بويىنشا قازاقستان رەسپۋبليكاسىنىڭ 8 زاڭنامالىق اكتىسىنە 33 تۇزەتۋ ەنگىزە وتىرىپ، بۇقارالىق سپورت جونىندەگى زاڭ جوباسى ماجىلىسكە ەنگىزىلدى.
