ءبىلىم ءمينيسترى ۇلتتىق كەڭەس مۇشەلەرىمەن پرەزيدەنت تاپسىرمالارىنىڭ ورىندالۋىن تالقىلادى
«ءبىلىم جانە عىلىم ءمينيسترى اسحات ايماعانبەتوۆتىڭ ۇلتتىق كەڭەس مۇشەلەرىمەن ونلاين فورماتتا تالقىلاۋى ءوتتى. كۇن تارتىبىندەگى نەگىزگى ماسەلە مامىر ايىندا وتكەن ۇلتتىق كەڭەستىڭ ءۇشىنشى وتىرىسىندا پرەزيدەنتتىڭ بەرگەن تاپسىرمالارى مەن كەڭەس مۇشەلەرى تاراپىنان ايتىلعان ۇسىنىستاردىڭ جۇزەگە اسىرىلۋى بولدى. اتالعان ءۇشىنشى وتىرىستىڭ ناتيجەسى بويىنشا، 30 پۋنكتىدەن تۇراتىن جوسپار قابىلدانعان بولاتىن. مىنە، وسى جوسپاردىڭ ورىندالۋى بويىنشا، ءاربىر ۇسىنىس قالاي قارالىپ، قانداي شەشىم قابىلدانىپ، قالاي جۇزەگە اسىپ جاتقانى بويىنشا مينيستر ارنايى اقپارات بەردى. ياعني، بۇل كەزدەسۋ مەملەكەتتىك ورگاندار مەن قوعام بەلسەندىلەرى اراسىندا كەرى بايلانىس ورناتۋدىڭ جاقسى ۇلگىسى بولدى. ادەتتە مەملەكەتتىك ورگاندار قوعام بەلسەندىلەرمەن كەزدەسۋ وتكىزىپ، سۇراقتارى مەن ۇسىنىستارىن تىڭداسا دا، كوپ جاعدايدا سول ايتىلعان ۇسىنىستار قالاي قابىلدانىپ، قالاي جۇزەگە اسىپ جاتقانى بويىنشا اقپارات بەرمەيدى. سوندىقتان، بۇگىنگى كەزدەسۋ ۇلتتىق كەڭەس مۇشەلەرىنە ءبىلىم جانە عىلىم مينيسترلىگىنەن ەكى اي بۇرىن وتكەن جيىن بارىسىندا كوتەرگەن ءوز ۇسىنىستارىنا قاتىستى ناقتى جاۋاپ الۋعا مۇمكىندىك بەردى»، - دەدى ە. قارين.
سونىمەن قاتار، جيىندا ۇلتتىق كەڭەس مۇشەلەرى كانات يليچ نۋروۆ، گۋلميرا يلەۋوۆا، اسىلبەك قوجاحمەتوۆ، ايگۇل ورىنبەك ، مۇحتار تايجان ،ەرلان سارين مينيستر مىرزاعا جۇرتشىلىقتى الاڭداتىپ جۇرگەن كوپتەگەن وزەكتى دە وتكىر ماسەلەلەرگە قاتىستى سۇراقتارىن قويىپ، ءوز پىكىرلەرىن جەتكىزگەن.
«جيىن اياعىندا، بەلگىلى ءبىر ۋاقىت وتكەننەن كەيىن تالقىلاۋدى تاعى ۇيىمداستىرۋ بويىنشا شەشىم قابىلداندى. جالپى، ۇلتتىق كەڭەس مۇشەلەرىنىڭ ورتالىق مەملەكەتتىك بيلىك ورگاندارىنىڭ باسشىلارىمەن كەزدەسۋ پراكتيكاسى جالعاساتىن بولادى. ۇكىمەتپەن مينيسترلەردىڭ ۇلتتىق كەڭەس مۇشەلەرىمەن وسىنداي تالقىلاۋلاردى تۇراقتى وتكىزۋ بويىنشا جوسپار قابىلداندى. كەلەسى اپتادا ۇلتتىق كەڭەس مۇشەلەرىنىڭ ەكولوگيا ءمينيسترى ماعزۇم مىرزاعالييەۆپەن ونلاين فورماتتاعى تالقىلاۋى وتەدى»، - دەپ تولىقتىردى ق ر پرەزيدەنتىنىڭ كومەكشىسى.
