چەمپيوندار ليگاسىندا «رەال مادريد» پەن «يۋۆەنتۋس» جارىستان شىعىپ قالدى
ەستەرىڭىزگە سالا كەتەلىك، دوپ دوداسى 11- ناۋرىزدان كەيىن كوروناۆيرۋس ىندەتىنە بايلانىستى كەيىنگە شەگەرىلدى. تۋرنيردىڭ 1/8 فينالىنداعى ءتورت ويىن بولىپ، قالعان تورتەۋى وتكىزىلمەي قالعان ەدى. شيرەك فينالعا ناۋرىز ايىندا «لەيپتسيگ» (گەرمانيا)، «اتلەتيكو مادريد» (يسپانيا)، «اتالانتا» (يتاليا) جانە «پاري سەن- جەرمەن» (فرانسيا) كوماندالارى جولداما العان بولاتىن.
بۇگىن انگليادا جەرگىلىكتى «مانچەستەر سيتي» جانە يسپانيانىڭ «رەال مادريد» كوماندالارى كەزدەستى. اعىلشىندار مادريدتە وتكەن العاشقى ويىندا 2:1 ەسەبىمەن باسىم تۇسكەن ەدى. سوندىقتان «رەال مادريد» بۇگىن بارىن سالدى. دەگەنمەن ويىندا «مانچەستەر سيتي» ساپىنان راحيم ستەرلينگ 9-مينۋتتا ەسەپ اشتى. وعان 28-مينۋتتا «رەال» شابۋىلشىسى كاريم بەنزەما ءبىر گولمەن جاۋاپ بەردى. ال 68-مينۋتتا اعىلشىن كلۋبىنىڭ ويىنشىسى گابريەل جەزۋس «مانچەستەر سيتيدى» تاعى دا العا شىعاردى. كەزدەسۋدە اعىلشىن كلۋبى 2:1 ەسەبىمەن جەڭىسكە جەتىپ، جارىستىڭ كەلەسى ساتىسىنا جولداما الدى.
تاعى ءبىر ويىن يتاليادا ءوتتى. تۋريننىڭ «يۋۆەنتۋسى» ءوز الاڭىندا فرانسيانىڭ «ليون» كلۋبىن قابىلدادى. ويىننىڭ 12-مينۋتىندا «ليون» ويىنشىسى مەمپيس دەپاي پەنالتيدەن ەسەپ اشسا، وعان «يۋۆەنتۋس» ساپىنان كريشتيانۋ رونالدۋ دا 43-مينۋتتا پەنالتيدەن جاۋاپ بەردى. كريشتيانۋ رونالدۋ 60-مينۋتتا تاعى ءبىر مارتە مەرگەندىك تانىتىپ، ءوز كومانداسىن العا شىعاردى. كەزدەسۋدە «يۋۆەنتۋس» 2:1 ەسەبىمەن باسىم ءتۇستى. دەگەنمەن العاشقى ويىندا 1:0 ەسەبىمەن جەڭىسكە جەتكەن «ليون» جارىستى جالعاستىراتىن بولدى.
شيرەك فينالدا «مانچەستەر سيتي» مەن «ليون» ءوزارا جۇپ قۇرادى. تۋرنيردىڭ اتالعان ساتىسىنداعى تاعى ەكى ويىن 8 - تامىزدا وتكىزىلەدى. بۇل كۇنى «بارسەلونا» (يسپانيا) مەن «ناپولي» (يتاليا)، «باۆاريا» (گەرمانيا) مەن «چەلسي» (انگليا) كوماندالارى كەزدەسەدى.
ويىندار «قازاقستان» جانە «قازسپورت» تەلەارنالارىنان ەلوردا ۋاقىتىمەن 00.50-دە تىكەلەي ەفيردە كورسەتىلەدى. چەمپيوندار ليگاسىنىڭ قالعان بولىگى پورتۋگاليا استاناسى - ليسسابون قالاسىندا وتەدى. ول سەگىزدىك فينالى فورماتىندا بولادى. ويىندار 10-23 - تامىز ارالىعىندا وتكىزىلەدى.
اۆتور: ءادىلجان ۇمبەت
