قازىرگى ۋاقىتتا حالىق ساناعىنا قاتىستى ءىس- شارالار وتكىزىلمەيدى - ستاتيستيكا كوميتەتى
«الەۋمەتتىك جەلى مەن مەسسەندجەرلەردە الاياقتىقتىڭ جاڭا ءبىر ءتۇرى پايدا بولعانى تۋرالى اقپارات تارالۋدا. قولدارىنا پاپكا ۇستاعان، كۋالىكتەرى بار، اق جەيدەدەگى جاستار وزدەرىنىڭ اكىمدىكتەن ەكەندىكتەرىن جانە حالىق ساناعىن جۇرگىزىپ جۇرگەندەرىن حابارلاي وتىرىپ، ۇيلەردى ارالاۋدا. وسىعان بايلانىستى ق ر ۇلتتىق ەكونوميكا مينيسترلىگى ستاتيستيكا كوميتەتى قالىڭ جۇرتشىلىق پەن تۇرعىندارعا اقپارات بەرۋ ماقساتىندا مۇنداي «سىلتەمەلەردىڭ» شىندىققا جاناسپايتىنىن جانە حالىق ساناعىن وتكىزۋگە ەشقانداي قاتىسى جوق ەكەنىن رەسمي تۇردە حابارلايدى» ، دەلىنگەن حابارلامادا. كوميتەتتىڭ مالىمدەۋىنشە، ەلدەگى كورونوۆيرۋس ينفەكتسياسىنىڭ تارالۋى بويىنشا قالىپتاسقان جاعدايعا جانە قاتاڭ كارانتين شەكتەۋ شارالارىنىڭ ەنگىزىلۋىنە بايلانىستى، ق ر ۇكىمەتى ۇلتتىق حالىق ساناعىن وتكىزۋ مەرزىمىن كەيىنگە قالدىرۋ تۋرالى ماسەلەنى قاراستىرۋدا. «وسىعان بايلانىستى، قازىرگى ۋاقىتتا حالىق ساناعىنا قاتىستى ءىس- شارالار وتكىزىلمەيدى»، دەلىنگەن حابارلامادا.
