قاراعاندى جۇقپالى اۋرۋلار اۋرۋحاناسىنىڭ دارىگەرلەرىنە «العىس پاكەتتەرى» تابىس ەتىلدى
ال پارتيانىڭ جاستار قاناتى - «Jas Otan» استارى كۇندىز-ءتۇنى قورعانىس كيمدەرىن كيىپ، جۇمىس ىستەيتىن مەديتسينا قىزمەتكەرلەرىنە «العىس پاكەتتەرىن» تابىس ەتتى.
وسىلايشا Nur Otan پارتياسى Birgemiz اكتسياسىن جالعاستىرۋدا، دەپ حابارلايدى قازاقپارات وبلىس اكىمدىگىنىڭ رەسمي سايتىنا سىلتەمە جاساپ.
Nur Otan پارتياسىنىڭ ساتبايەۆ قالالىق فيليالى مەن «سپتۆس» ج ش س جانە پارتيا ارداگەرى قورعانباي قۇلشاريەۆپەن بىرلەسىپ، تۋبەركۋلەزگە قارسى ديسپانسەرگە، ورتالىق قالالىق اۋرۋحاناعا جانە ساتبايەۆتىڭ مەديتسينالىق- سانيتارلىق بولىمىنە 200 ليتر قىمىز، 50 كيلوگرامم ەت جەتكىزدى. پارتيانىڭ نۇرا اۋداندىق فيليالى «جەر» فەرمەرلىك قوجالىعىمەن بىرگە 100 ليتر قىمىز جيناپ، نۇرا اۋدانىنىڭ ورتالىق اۋرۋحاناسىنا جەتكىزدى.
ۇلىتاۋ اۋدانىنىڭ تۇرعىنى، شارۋا قوجالىعىنىڭ يەسى داۋرەن بايبولوۆ ءوز اۋدانىنىڭ ورتالىق اۋرۋحاناسىنا 200 كيلوگرامنان استام ەت، 30 ليتر قىمىز، 100 كيلوگرامنان استام كوكونىس جانە باسقا دا ازىق- تۇلىك اكەلدى. بۇقار جىراۋ اۋدانىنىڭ قۇرمەتتى ازاماتى، ايتىسكەر اقىن ايتباي جۇماعۇلوۆ بوتاقارا كەنتىنىڭ اۋرۋحاناسىنا جاقىن ارادا جەتكىزىلەتىن ءو ج ج اپپاراتىن ساتىپ الدى. دارىگەرلەر دە نازاردان تىس قالعان جوق. ولارعا قاراعاندىلىقتار «العىس پاكەتتەرىن» تابىس ەتتى. «دارىگەرلەرگە مىڭ العىس» اكتسياسى اياسىندا قاراعاندى قالاسىنىڭ №1-كوپسالالى اۋرۋحاناسى بازاسىندا جۇقپالى اۋرۋلار گوسپيتالىنىڭ دارىگەرلەرى ازىق- تۇلىك جيىنتىقتارىن الدى. وندا كۇن سايىن ەكى اۋىسىمدا 120-دان استام مەديتسينا قىزمەتكەرى ەڭبەك ەتەدى.
«العىس پاكەتى» گوسپيتال قىزمەتكەرلەرىنىڭ تىلەكتەرىن ەسكەرە وتىرىپ جاسالعان. اپتاپ ىستىق كۇندەرى ولار ارنايى كوستيۋم، ماسكا جانە قولعاپپەن جۇرۋگە ءماجبۇر. ءاربىر جيىنتىققا ىلعالدى مايلىق، قول كرەمى، بال، ليمون، مينەرالدى سۋ، تابيعي سۋسىندار جانە باسقالار كىردى. Nur Otan پارتياسىنىڭ Birgemiz رەسپۋبليكالىق اكتسياسى ايماقتا كارانتين تولىق اياقتالعانعا دەيىن جالعاسادى. كۇن سايىن وعان كوپتەگەن ادامدار اتسالىسىپ، مەتسەناتتار، كاسىپكەرلەر مەن ەرىكتىلەر بەلسەندى كومەك كورسەتەدى.
