كوبەيتۇزدا ەمدىك قاسيەت بار ما - كوميتەت جاۋاپ بەردى
«بىرەگەي دە كورىكتى كولدەگى قازىرگى احۋالعا الاڭداپ وتىرمىز. الەۋمەتتىك جەلىدە بۇل كولگە قاتىستى اقپاراتقا تولىپ كەتكەنىن بىلەسىزدەر. بۇل جاعدايعا الاڭداۋشىلىق بىلدىرە وتىرىپ، ءبارىن ءوز كوزىمىزبەن كورۋ ءۇشىن وسىندا كەلدىك. كول 640 گا اۋماقتى الىپ جاتىر. تەرەڭدىگى ءبىر جارىم مەتر. كوپ ادام قىزعىلت ءتۇس تۇزدان نەمەسە توپىراقتان شىعىپ تۇر دەپ، قاتە ويلايدى. بەلگىلى ءبىر ميكرواعزالار كولدى وسىنداي تۇسكە بولەپ تۇر»، - دەيدى زۇلفۇحار جولداسوۆ اقمولا وبلىسىنا ورنالاسقان كوبەيتۇز كولىنە باسپا ءسوز تۋرى بارىسىندا.
ونىڭ ايتۋىنشا مۇنداي كولدەر اۆتراليا مەن كانادادا دا بار.
«ءبىزدىڭ بىرەگەي كولىمىز ءوزىنىڭ ەرەكشە تۇسىمەن حالىقتى ىنتىقتىرىپ وتىر. الەۋمەتتىك جەلىدە دەمالىس كۇندەرى قانشاما حالىقتىڭ وسىندا كەلەتىنىن كوردىڭىزدەر. كولدىڭ قانداي دا ءبىر ەمدىك قاسيەتى بار دەپ، حالىق بەكەر ويلايدى. شىنتۋايتىندا بۇل كولدىڭ ەشقانداي قاسيەتى جوق. بۇل باسقا كولدەردە بار تۇز. ارتىق ەشتەڭەسى جوق. سوعان قاراماستان دەمالىس كۇندەرى وسىندا كەلگەن حالىق تۇز بەن باتپاقتى الىپ كەتىپ جاتىر. وسى كولگە كەلە جاتىپ، ءتىپتى ادامدار كول تۇزىنىڭ كەلىسىن 5 مىڭ تەڭگەگە ساتقىسى كەلەتىنى تۋرالى حابارلاما تاراعانىن دا كوردىم. البەتتە بۇل شىندىققا جاناسپايدى»، - دەيدى ول.
ەسكە سالساق، بۇعان دەيىن كوروناۆيرۋستى ەمدەيدى دەگەن جەلەۋمەن كوبەيتۇز كولى تۇزىنىڭ كەلىسى الەۋمەتتىك جەلىدە 5 مىڭ تەڭگەدەن ساتىلىپ جاتقانى تۋرالى حابارلاعان بولاتىنبىز.
