كوروناۆيرۋس ىندەتىنە قارسى ۆاكتسينا قاشان پايدا بولۋى مۇمكىن - مامان بولجامى
«باس رەداكتورلار كلۋبى» قوعامدىق بىرلەستىگىنىڭ پرەزيدەنتى، بەلگىلى مەديامەنەدجەر بيبىگۇل جەكسەنبايمەن Instagram ارقىلى سۇحباتتاسقان، مەديتسينا عىلىمدارىنىڭ دوكتورى، پروفەسسور، د د س ۇ- دا قىزمەت ەتكەن ماقسۇت قۇلجانوۆ وسىنداي بولجامىمەن ءبولىستى، دەپ حابارلايدى قازاقپارات ءتىلشىسى.
«كوروناۆيرۋس - ادامنىڭ اعزاسىن وتە قاتتى زاقىمدايتىن ۆيرۋس. ماسەلەن تۇماۋ قاۋىپتى دەسەك تە، ول ادامنىڭ اعزاسىنا قاتتى زاقىم اكەلمەيدى. بۇل ۆيرۋستىڭ وزگەشەلىگى - مۇنىمەن كۇرەسۋ وتە قيىن. جاڭا ۆيرۋس بولعاننان كەيىن حالىق تا، مەديتسينا قىزمەتكەرلەرى ول تۋرالى بىلگەن جوق. كۇن سايىن وسى ۆيرۋستىڭ قانشالىقتى قاۋىپتى ەكەنىن ءبىلىپ وتىرمىز. بۇل ءبىر. ەكىنشىدەن، كوروناۆيرۋستىڭ اينالاسىندا ءارتۇرلى اڭگىمە تاراپ ءجۇر. ادەيى قولدان جاسالعان دەگەن پىكىر دە باسىم. كوبى جالعان. بۇل ۆيرۋستىڭ شىققان ۋاقىتى - 2019-جىلدىڭ اياعى دەپ جاريالاندى. مۇمكىن ودان دا ەرتەرەك شىققان بولار. ءبىراق مەنىڭ سەنەتىنىم - بۇل ۆيرۋس تابيعاتتان شىققان»، - دەدى ماقسۇت قۇلجانوۆ.
پروفەسسوردىڭ ايتۋىنشا، الداعى 1-2 جىلدا ادامزاتتىڭ بۇل ۆيرۋستى جەڭۋى قيىن.
«كوروناۆيرۋس ادامزاتقا كەلدى - ەندى شىقپايدى دەپ ويلايمىن. تۇماۋ سياقتى بۇنىمەن دە قايتا- قايتا كۇرەسۋ كەرەك. بۇل - بارىمىزگە ورتاق سىناق»، - دەدى ول.
ماقسۇت قۇلجانوۆ كوروناۆيرۋسقا قارسى ۆاكتسينا تابۋ - الداعى 2-3 ايدىڭ جۇمىسى ەمەس. تاريحقا تالداۋ جاساساق، ءبىر اۋرۋعا جاڭا ۆاكتسينا 8-10 جىل جاسالادى.
«ءاربىر ينستيتۋتتىڭ ۆاكتسينا جاساۋداعى جۇمىس ساتىلارى بولادى. ءبىر ساتىدان دا اتتاپ وتۋگە كەلمەيدى. مۇمكىن كەيبىر عىلىمي ورتالىقتار وسى كەزەڭدەردى قىسقارتىپ شىعارۋى مۇمكىن. بۇل ۆاكتسينا شىعارۋدىڭ ەتيكالىق زەرتتەۋلەرى دە بارىن اتاپ ءوتۋ كەرەك. ەڭ باستىسى بۇل ەكپە - ادامعا زاقىم كەلتىرمەۋى كەرەك. وتە قيىن شارۋا. قازىرگى كەيبىر عىلىمي ورتالىقتار ب ا ق- قا «ۆاكتسينانى تاجىريبەدەن شىعاردىق، كلينيكالىق ساتىسىنا كوشتىك» دەپ جاريالاپ جاتىر. ءبىراق مەنىڭ ويىمشا كەلەسى جىلدان ەرتە ۆاكتسينا شىقپايدى. رەاليستىك تۇرعىدان قاراعاندا ۆاكتسينا 2022-جىلى دايىن بولۋى مۇمكىن. ءار ەلدىڭ عىلىمي ورتالىقتارى ءدارىنى بولسىن، ۆاكتسينانى بولسىن ساراپتايدى. ودان وتپەۋ مۇمكىن ەمەس. ءبىزدىڭ ەلدە دە سونداي جۇمىس جۇرگىزىلىپ جاتىر»، - دەدى ول.
