اسپانداعى ەڭ جارىق قۇيرىقتى جۇلدىز
بۇل جارىق جۇلدىز، اسىرەسە، وسى جىلدىڭ شىلدە ايىندا جەرگە جاقىن كەلمەك. دەمەك، ونى كەز كەلگەنىمىز كورە الامىز دەگەن ءسوز.
ماسەلەن، كەشە Massaget ۇجىمىنىڭ فوتوتىلشىسى ەرنار المابەك وسى كومەتانى سۋرەتكە ءتۇسىرىپ ۇلگەردى.
اسىرەسە، 23- شىلدە - قۇيرىقتى جۇلدىزدىڭ جەرگە ەڭ جاقىن كەلەتىن كۇنى. ونى سولتۇستىك كوكجيەككە قاراپ تانۋعا بولادى. جۇلدىز كۇنگە جاقىن جاتقاندىقتان، تاڭعا جۋىق جاقسى كورىنەدى.
C/2020 F3 قۇيرىقتى جۇلدىزى 2020-جىلدىڭ 27- ناۋرىزىندا تابىلعان. ونى 2009-جىلى وربيتاعا جىبەرىلگەن NEOWISE اتتى ينفراقىزىل تەلەسكوپ انىقتاعان. اتالمىش تەلەسكوپتى عارىشقا جىبەرۋدەگى عالىمداردىڭ ماقساتى الىس گالاكتيكاداعى دەنەلەردى، كۇنگە جاقىن جۇلدىزداردى، قۇس جولىنداعى استەرويدتار مەن جەرگە جاقىن ترويان استەرويدتارىن تابۋ بولاتىن.
بۇل ماقساتىنا عالىمدار جەتكەن سىڭايلى. تەلەسكوپ وتە جىلدام ءارى كۇننىڭ جانىنداعى قوزعالىپ جۇرگەن عارىش دەنەلەرىن انىقتاۋعا وپتيكاسى جەتكىلىكتى. سونىڭ ارقاسىندا ونداعان كومەتانىڭ ءجۇرىس جولىن انىقتادى.
ال C/2020 F3 جۇلدىزىن كۇننەن ەكى استرونوميالىق بىرلىك جەردەگى قاشىقتىقتان تاپقان. مۇنى قۇيرىقتى جۇلدىز ەمەس، جاي جۇلدىز دەپ اتاۋىمىزدىڭ سەبەبى بار. ويتكەنى باسىندا بۇل جۇلدىزدىڭ قۇيرىعى دا، كوماسى دا بولماعان. مۇز تۇيىرشىكتەرىنە ۇقساس شاڭ باسقان قاباتپەن قاپتالىپ جاتقان.
الايدا 3- شىلدە كۇنى كۇنگە 44 ميلليون شاقىرىمعا جەرگە دەيىن جاقىنداپ، جارىق جۇلدىزعا، عارىشتاعى ەڭ جارىق دەنەلەردىڭ بىرىنە اينالىپ شىعا كەلدى. ال جارىعىنىڭ ولشەمى شامامەن، 1m - گە (جۇلدىزدى ولشەۋ بىرلىگى)، قۇيرىعىنىڭ ۇزىندىعى 30 بۇرىش مينۋتىنا (اي ديسكىسىنىڭ ديامەترى) تەڭ.
ءتۇن تاستاي قاراڭعى كۇندەرى بۇل قۇيرىقتى جۇلدىزدى كورۋ وڭاي بولادى. ال 17- شىلدە كۇنى جەتىقاراقشىعا جاقىن كەلەدى دە كوزگە وڭاي تۇسەدى.
حالىقارالىق عارىش بەكەتىنىڭ عارىشكەرى يۆان ۆاگنەردىڭ ريا نوۆوستيگە بەرگەن سۇحباتىندا مۇنداي جارىق قۇيرىقتى جۇلدىزدى سوڭعى رەت 1997-جىلى كورگەنىن، سودان بەرى 23 جىل وتسە دە، سونداي جارىق قۇبىلىستى كورمەگەنىن ايتقان.
قۇيرىقتى جۇلدىزدىڭ وربيتاسى سوزىلعان ەلليپسيس، شامالى پارابولاعا ۇقساس. عالىمداردىڭ ەسەبىنشە، ونىڭ بۇرىنعى افەلياسى كۇننەن 544 ا. ە قاشىقتىقتا بولعان، وربيتالىق پەريودى 4500 -جىلعا تەڭ. كۇنگە جاقىنداعاننان كەيىن جۇلدىزدىڭ وربيتاسى ءبىرشاما وزگەرىپ، ودان ءارى سوزىلعان. ال اينالۋ پەريودى 6800 جىلعا دەيىن ۇزارعان.
C/2020 F3 كومەتاسى - عارىش پەن استرونومياداعى ەرەكشە قۇبىلىستاردىڭ ءبىرى. مۇنداي جارىق جۇلدىزدى ۇلى جۇلدىز دەپ اتاۋعا بولادى دەسەدى. ەندى مۇنداي قۇيرىقتى جۇلدىزدى 5 -جىلدان كەيىن عانا كورۋگە بولاتىن كورىنەدى.
