كوروناۆيرۋستان اۋىرىپ شىققان الماتىلىقتار قان پلازماسىن تاپسىرىپ جاتىر
اۋىر جانە ورتاشا دەڭگەيدە اۋىرىپ تۇرعان ناۋقاستار ەندى رەسپۋبليكالىق قان ورتالىعىنا كەلىپ، پلازما تاپسىرىپ جاتىر.
«ءبىر دونوردان الىنعان پلازما كەمىندە 2-3 ادامنىڭ ءومىرىن ساقتاپ قالۋعا مۇمكىندىك بەرەدى» ، - دەيدى دارىگەرلەر.
ماديار ءالجاپپاروۆ - كوروناۆيرۋس ىندەتىن جەڭىپ شىققانداردىڭ ءبىرى. وسىدان بىرنەشە كۇن بۇرىن وكپەسىنىڭ %60 ءى قابىنىپ، اۋىر حالدە اۋرۋحاناعا تۇسكەن. «دارىگەرلەردىڭ كومەگىنىڭ ارقاسىندا امان قالدىم» ، دەيدى. ەندى ول بۇگىن وزگەنىڭ ومىرىنە اراشا بولۋ ءۇشىن قان ورتالىعىنا كەلىپ، پلازما تاپسىردى. الدىن الا تەكسەرۋدەن سوڭ ونىڭ قانىندا بۇل ىندەتكە قارسى تۇرا الاتىن انتيدەنەلەر كورسەتكىشى 5,7 بولعان. ال، قان ورتالىعى ماماندارىنىڭ ايتۋىنشا، قاتەرلى دەرتتى جەڭىپ شىعۋ ءۇشىن ادام اعزاسىنداعى انتيدەنەلەر كورسەتكىشى كەمىندە 1,4 بولۋ كەرەك.
ماديار ءالجاپپاروۆ، قالا تۇرعىنى:
- وسىنداي جاعدايدى ءوزىمىز كورىپ العاننان كەيىن، جاڭاعى سىرقاتپەن ءبىر اۋناپ تۇرعاننان كەيىن قازىرگى اۋىرىپ جاتقان ادامدارعا كۇندەلىكتى ەستىپ جاتىرمىز، قانشاما ادامدار قايتىس بولىپ جاتىر، وسى اۋرۋمەن كۇرەسۋدە تەك قانا دارىگەرلەر ەمەس، ءبىز قوعام بولىپ وسىعان اتسالىسۋىمىز كەرەك. ىندەتتەن ەمدەلىپ شىققان دەميندەر وتباسى پلازمانى وسىمەن ەكىنشى رەت تاپسىرۋدا. دەنساۋلىعىڭىز جاقسى، ال انتيدەنەلەر كورسەتكىشى ويداعىداي بولسا، اراعا 14 كۇن سالىپ قايتا دونور بولۋعا بولادى.
بۇگىنگى كۇنگە دەيىن قان ورتالىعىنا ءوز ەرىكتەرىمەن 227 ادام پلازما تاپسىرۋعا كەلىپتى. ءبىراق سونىڭ ىشىنەن تەك 87 ادامنىڭ قان تاپسىرۋعا قارسى كورسەتكىشتەرى بولماعان.
عالىمجان مادەماروۆ، رەسپۋبليكالىق قان ورتالىعى قان دايىنداۋ بولىمشەسىنىڭ مەڭگەرۋشىسى:
- ءبىز ىندەتپەن اۋرىپ شىققان كىسىلەردىڭ پلازمالارىن الامىز. ويتكەنى ول كىسىلەردىڭ قاندارىندا جاڭاعى انتيتەلالار ساقتالىپ قالادى. اۋىرىپ، ەمدەلىپ شىققانان كەيىن، سول سەبەپتەن بۇل پروتسەستىڭ اتاۋى - پلازموفورەز. سول سەبەپتەن، ءبىز جالپاق تىلمەن ايتقاندا، قان الامىز، ءبىراق سونىڭ ىشىنەن پلازماسىن ءبولىپ الامىز. قالعان ەريتروتسيتتەر، ترومبوتسيتەتر، قالعان جاسۋشالارى وزىنە قايتادى. ءبىر دونوردان 400-600 م ل پلازما الىنادى. ودان 2-3 ەمدىك دوزا شىعادى. القىنىپ، دەم الا الماي جاتقان ناۋقاستارعا اۋاداي قاجەت انتيدەنەلەرى بار پلازمالار، تاپسىرىس بەرگەن بارلىق مەديتسينالىق ۇيىمدارعا جونەلتىلۋدە. العاشقى ناتيجەلەر جامان ەمەس. اسىرەسە، جانساقتاۋ بولىمىندە جاتقان ناۋقاستارعا كومەگى تيگەن. «ءبىراق پلازمانىڭ ءوزى ناۋقاستىڭ كلينيكالىق كورسەتكىشتەرىنە ساي قۇيىلاتىنىن ۇمىتپاۋ كەرەك» ، - دەيدى ماماندار.
